Trump បដិសេធការលើកឡើងថា Elon Musk ទើបជាប្រធានាធិបតីពិត

អាមេរិក៖ លោកប្រធានាធិបតីសហរដ្ឋអាមេរិក Donald Trump បាន ច្រានចោលការតិះដៀល ដែលថា Elon Musk ទើបជាប្រធានាធិបតី ឬ ជាអ្នកមានអំណាចពិតប្រាកដ នៅពីក្រោយប្រធានាធិបតីជាប់ឆ្នោតរ បស់សហរដ្ឋអាមេរិក Trump នេះបើតាមកាសែត Al Jazeera។

បើតាមប្រភព អំឡុងសុន្ទរកថា នៅរដ្ឋ Arizona កាលពីថ្ងៃអាទិត្យ លោក Donald Trump បានរុញច្រានគំនិតដែលថា លោកបាន «ប្រគល់តំណែងប្រធានាធិបតី» ទៅឲ្យមហាសេដ្ឋី Elon Musk ដែលបានដើរតួយ៉ាងលើសលប់ នៅក្នុងការផ្លាស់ប្តូរប្រធានាធិបតីជាប់ឆ្នោត ចូលទៅក្នុងសេតវិមាន។

ការអត្ថាធិប្បាយ របស់លោក Trump បានធ្វើក្រោយពេលប៉ុន្មានថ្ងៃ ដែលលោកមហាសេដ្ឋី ជាម្ចាស់ក្រុមហ៊ុន Tesla និង SpaceX រូបនេះ បានធ្វើអន្តរាគមន៍ ជាមួយប្រធានាធិបតីជាប់ឆ្នោត ដើម្បីបំបែកច្បាប់ថវិកា ដែលបានចរចា នៅក្នុងសភា។

ឧប្បត្តិហេតុនេះគឺជារឿងចុងក្រោយបង្អស់ដែលលោក Musk បានដើរតួយ៉ាងធំ ជាធម្មតា នៅក្នុងរដ្ឋបាល Trump ដែលនឹងចូលមកដល់ ដែលបង្កឱ្យមានការរិះគន់ ពីគណបក្សប្រជាធិបតេយ្យ ថែមទាំង ពីផ្ទៃក្នុង គណបក្សសាធារណៈរដ្ឋ របស់លោក Trump ទៀតផង។

ឆ្លើយតបនឹងការរិះគន់នេះ លោក Trump បានសរសើរ Musk តែបញ្ជាក់ថា «គាត់មិនកាន់តំណែងជាប្រធានាធិបតី ទេ»។
លោក Trump បានហៅការចោទដែលលោកបាន «ប្រគល់តំណែងប្រធានាធិបតីទៅឲ្យលោក Elon Musk» គឺជាការ «បោកបញ្ឆោត» មួយទៀត ដែលជំរុញដោយគូប្រជែងនយោបាយរបស់លោក។

នៅក្នុងការបកស្រាយ នាពេលក្រោយ លោក Trump បានកត់សម្គាល់ថា មិនអាចទៅរួច ដែលអាចឲ្យលោក Musk ក្លាយជាប្រធានាធិបតីនោះទេ ដោយសារតែលោកនឹងត្រូវបានរារាំង ដោយរដ្ឋធម្មនុញ្ញ។

លោក Trump បានចោទសួរហ្វូងមនុស្សថា «អ្នកដឹងថាហេតុអ្វីបានជាគាត់មិនអាចធ្វើជាប្រធានាធិបតី?» លោកបានឆ្លើយខ្លួនឯងថា «គាត់មិនបានកើតនៅក្នុងប្រទេសនេះទេ»៕

ប្រភពពី Al Jazeera ប្រែសម្រួល៖ សារ៉ាត