មេដឹកនាំកូរ៉េខាងជើង លោក គីម ជុងអ៊ុន បាននិយាយ កាលពីថ្ងៃទី២១ ខែកញ្ញាថា ការអភិវឌ្ឍអាវុធនុយក្លេអ៊ែរ គឺជាការរស់រានមានជីវិតរបស់កូរ៉េខាងជើង ក្នុងការប្រឈមមុខនឹងការគំរាមកំហែងយ៉ាងធ្ងន់ធ្ងរ ពីសហរដ្ឋអាមេរិក និងកូរ៉េខាងត្បូង។ លោក គីម ជុងអ៊ុន បញ្ជាក់ទៀតថា កូរ៉េខាងជើង​អាច​និយាយ​ជាមួយ​អាមេរិក​បាន ប្រសិនបើ​ ទីក្រុងវ៉ាស៊ីនតោន ឈប់​ទទូច​លើ​ការ​រំសាយ​អាវុធ​នុយក្លេអ៊ែរ។ ថ្លែងចេញពីសភាប្រជាជនកំពូល កាលពីថ្ងៃអាទិត្យ លោក គីម បាននិយាយដែរថា លោកនៅតែមានការចងចាំ ដ៏ពេញចិត្តចំពោះប្រធានាធិបតីសហរដ្ឋអាមេរិក លោក ដូណាល់ ត្រាំ នេះបើតាមកាសែតរដ្ឋ KCNA រាយការណ៍ នៅថ្ងៃចន្ទនេះ៕