ចិនចំហរទ្វារចរចា ក្រោយលោក Trump ចង់បន្ថយពន្ធចិន

ប៉េកាំង ៖ ប្រទេសចិននៅថ្ងៃពុធនិយាយថា ទ្វារនៅតែបើកចំហជានិច្ច សម្រាប់កិច្ចចរចាពាណិជ្ជកម្មជាមួយអាមេរិក មួយថ្ងៃក្រោយលោកប្រធានាធិបតី Donald Trump ផ្តល់សញ្ញាចង់បន្ធូរបន្ថយពន្ធចិនវិញ។

លោក ត្រាំ បានគូសបញ្ជាក់ថា ពន្ធគយ ១៤៥% គឺខ្ពស់ណាស់ ហើយវានឹងមិនខ្ពស់ដល់ថ្នាក់នោះទេ… វានឹងធ្លាក់ចុះយ៉ាងខ្លាំង ប៉ុន្តែវានឹងមិនធ្លាក់ដល់សូន្យទេ។

ជាការឆ្លើយតប អ្នកនាំពាក្យក្រសួងការបរទេសចិន លោក Guo Jiakun បានប្រាប់សន្និសីទកាសែតថា ដូចចិនបាននិយាយពីដំបូងហើយថា គ្មានអ្នកឈ្នះនៅក្នុងសង្គ្រាមពន្ធ និងសង្គ្រាមពាណិជ្ជកម្មទេ ដូច្នេះទ្វារចរចា គឺនៅតែបើកចំហជានិច្ច។

បើតាមលោក Guo អាមេរិកគួរតែបញ្ឈប់ការគំរាមកំហែង និងការបង្ខិតបង្ខំ… ហើយចូលរួមជាមួយចិនដោយផ្អែកលើគោលការណ៍ស្មើភាព និង ការគោរពគ្នាទៅវិញទៅមក ប្រសិនបើអាមេរិកពិតជាចង់បានកិច្ចព្រមព្រៀង៕

ប្រភព ៖ AFP