ក្រុមបាតុករអ៊ីស្រាអែល បានលើកបដាដ៏ធំមួយនៅឯទីលានចំណាប់ខ្មាំងកាលពីថ្ងៃសៅរ៍ ៣០ សីហា ដោយជំរុញឱ្យលោកប្រធានាធិបតីអាមេរិក Donald Trump បង្កើតប្រវត្តិសាស្ត្រ និងជំរុញឱ្យមានកិច្ចព្រមព្រៀងចំណាប់ខ្មាំងក្នុងតំបន់ហ្កាហ្សា។
កាលពីថ្ងៃសៅរ៍ដដែលនោះ ក្រុមគ្រួសារចំណាប់ខ្មាំងបានប្រមូលផ្តុំគ្នានៅទីក្រុង Tel Aviv អំពាវនាវឱ្យរដ្ឋាភិបាលអ៊ីស្រាអែលបញ្ចប់សង្រ្គាមនៅដែនដីហ្កាហ្សា និងនាំយកចំណាប់ខ្មាំងទាំងអស់មកវិញ ក្នុងកិច្ចព្រមព្រៀងពេញលេញមួយ។
ក្រុមគ្រួសារបាននិយាយថា មានកិច្ចព្រមព្រៀងមួយនៅលើតុ ហើយបានចោទប្រកាន់នាយករដ្ឋមន្ត្រី លោក Benjamin Netanyahu ថាផ្តល់អាទិភាពដល់ការវាយលុករបស់យោធា សំខាន់ជាងការវិលត្រឡប់របស់ចំណាប់ខ្មាំង និងបញ្ចប់សង្រ្គាម។
ការិយាល័យរបស់នាយករដ្ឋមន្ត្រី Benjamin Netanyahu បាននិយាយថា កាលពីថ្ងៃសុក្រ ២៩ សីហាថា អ៊ីស្រាអែលបានប្រទះឃើញសាកសពចំណាប់ខ្មាំង ឈ្មោះ Ilan Weiss ពីតំបន់ហ្កាហ្សាស្ទ្រីប។
ទន្ទឹមនឹងការរកឃើញសាកសពរបស់ចំណាប់ខ្មាំង Weiss អ៊ីស្រាអែលនិយាយថា ចំណាប់ខ្មាំងចំនួន ៤៩ នាក់នៅតែស្ថិតក្នុងតំបន់ហ្កាហ្សានៅឡើយ ក្នុងនោះមានតែ ២០ នាក់ប៉ុណ្ណោះដែលត្រូវបានគេជឿថានៅមានជីវិត៕
Leave a Reply