លោក ហ្សេលេនស្គី៖ អ៊ុយក្រែនរំពឹងថានឹងមានមូលនិធិចំនួន ៣,៥ពាន់លានដុល្លារអាម៉េរិកសម្រាប់សព្វាវុធរបស់អាម៉េរិកដើម្បីទ្រទ្រង់ការប្រយុទ្ធប្រឆាំងនឹងរុស្ស៊ី

ភ្នំពេញ ថ្ងៃទី១៩ ខែកញ្ញា ឆ្នាំ២០២៥ — ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskyy) បាននិយាយកាលពីពេលថ្មីៗនេះថា ប្រទេសអ៊ុយក្រែនរំពឹងថានឹងមានថវិកាប្រហែល ៣,៥ពាន់លានដុល្លារអាម៉េរិកនៅខែក្រោយនៅក្នុងមូលនិធិមួយដើម្បីទិញសព្វាវុធពីសហរដ្ឋអាមេរិក និងជួយទ្រទ្រង់ការប្រយុទ្ធអស់រយៈពេលជាង ៣ឆ្នាំរបស់ខ្លួនប្រឆាំងនឹងការឈ្លានពានរបស់រុស្ស៊ី។

ការរៀបចំហិរញ្ញវត្ថុដែលគេស្គាល់ថាជាបញ្ជីតម្រូវការអាទិភាពរបស់អ៊ុយក្រែន ឬ PURL ជាការរួមវិភាគទានពីសមាជិកអង្គការណាតូ លើកលែងតែសហរដ្ឋអាមេរិក ដើម្បីទិញសព្វាវុធ គ្រាប់បែក និងឧបករណ៍យោធារបស់អាម៉េរិក។

លោក ហ្សេលេនស្គី បាននិយាយនៅក្នុងសន្និសីទសារព័ត៌មានរួមគ្នានៅទីក្រុងគៀវជាមួយនឹងប្រធានសភាអឺរ៉ុប លោក រ៉ូបឺតតា មេតសូឡូ (Roberta Metsola) ដែលធ្វើទស្សនកិច្ចនៅអ៊ុយក្រែនថា «យើងទទួលបានថវិកាជាង ២ពាន់លានដុល្លារអាម៉េរិកហើយពីដៃគូរបស់យើង ជាពិសេសសម្រាប់កម្មវិធី PURL។ យើង​នឹង​ទទួល​បានថវិកា​បន្ថែមទៀតនៅ​ក្នុង​ខែ​តុលាខាងមុខនេះ។​ ខ្ញុំ​គិត​ថា ​យើង​នឹង​មានថវិកា​ប្រហែល​ពី ៣,៥ ទៅ ៣,៦ពាន់​លាន​ដុល្លារអាម៉េរិក»។

លោក ហ្សេលេនស្គី បានបដិសេធមិនផ្តល់ព័ត៌មានលម្អិតអំពីសព្វាវុធណាដែលនឹងដឹកជញ្ជូនដំបូងគេនោះទេ ប៉ុន្តែលោកបាននិយាយថា ពួកគេពិតជានឹងមានគ្រាប់មីស៊ីលសម្រាប់ប្រព័ន្ធមីស៊ីលការពារដែនអាកាស Patriot និងគ្រាប់បែកសម្រាប់ប្រព័ន្ធរ៉ុក្កែតកាំភ្លើងធំចល័តខ្ពស់ ឬ HIMARS។

ការ​បញ្ចប់​សង្គ្រាម​ហាក់​មិនមែនឆាប់ៗនេះ​ឡើយ បើ​ទោះ​បី​ជា​មាន​កិច្ច​ខិត​ខំ​ប្រឹង​ប្រែង​សន្តិភាព​ដែលដឹកនាំ​ដោយ​សហរដ្ឋ​អាមេរិក​រាប់​ខែមកហើយ​ក៏​ដោយ។

ប្រព័ន្ធ Patriot មានសារៈសំខាន់ណាស់ក្នុងការការពារប្រឆាំងនឹងការវាយប្រហារដោយគ្រាប់មីស៊ីលរបស់រុស្ស៊ី។ ប្រព័ន្ធ HIMARS បានពង្រឹងយ៉ាងខ្លាំងនូវសមត្ថភាពវាយប្រហារដ៏ជាក់លាក់របស់យោធាអ៊ុយក្រែន៕

ដោយ៖ យា ចិន្តាខន្តី (ប្រភព៖ កូរ៉េថាមស៍)