លោក ត្រាំ បញ្ជាក់ថា ក្រុមប្រឹក្សាសន្តិភាពធ្វើការជាមួយ UN

ដាវ៉ូស ៖ លោក ដូណាល់ ត្រាំ ប្រធានាធិបតីអាមេរិក បានគូសបញ្ជាក់ថា ក្រុមប្រឹក្សាសន្តិភាព ដែលទើបត្រូវបានចុះហត្ថលេខា ជាផ្លូវការ នឹងធ្វើការ រួមគ្នា ជាមួយអង្គការសហប្រជាជាតិ ហៅកាត់ UN។

លោកបាននិយាយ នៅឯពិធីបើកដំណើរការ ក្រុមប្រឹក្សាសន្តិភាព របស់លោក ស្ថិតក្នុងទីក្រុង Davos កាលពីថ្ងៃព្រហស្បតិ៍ ថា ស្ថាប័ននេះ នឹងធ្វើការ “រួមគ្នា” ជាមួយអង្គការសហប្រជាជាតិ ដោយលោកបន្ថែមថា UN មិនបានប្រើប្រាស់ តួនាទីប្រកបដោយសក្តានុពល របស់ខ្លួន នោះទេ។

គួរបញ្ជាក់ថា លោក Donald Trump បានចុះហត្ថលេខា លើធម្មនុញ្ញ នៃអ្វីដែលគេហៅថា “ក្រុមប្រឹក្សាសន្តិភាព” ដោយលោកបានបង្កើតចេញជាស្ថាប័ន សម្រាប់ដោះស្រាយជម្លោះអន្តរជាតិ ជាមួយនឹងសមាជិកស្ថាបនិកផ្សេងទៀត នៅប្រទេសស្វីស កាលពីថ្ងៃទី២២ ខែមករា ពោលគឺ នៅក្នុងពេលមានរៀបចំ វេទិកាសេដ្ឋកិច្ចពិភពលោក។

លោកស្រី Karoline Leavitt អ្នកនាំពាក្យសេតវិមាន បាននិយាយថា «ក្រុមប្រឹក្សាសន្តិភាព ឥឡូវនេះ គឺជាអង្គការអន្តរជាតិ ផ្លូវការ»។

ការលើកឡើងពីការបន្តសហការ ជាមួយ UN របស់លោក ត្រាំ បានកើតមានឡើង ចំពេលការព្រួយបារម្ភថា ក្រុមប្រឹក្សាសន្តិភាពនេះ អាចនឹងជំនួសអង្គការសហប្រជាជាតិ។

លោក ត្រាំ ធ្លាប់និយាយថា ប្រទេសដែលជាសមាជិកអចិន្រ្តៃយ៍ ត្រូវតែជួយផ្តល់មូលនិធិ ជាមួយនឹងការបង់ប្រាក់ ចំនួន១ពាន់លានដុល្លារ៕

ប្រភពពី AFP