អ៊ុយក្រែន និងរុស្ស៊ី ជួបចរចាផ្ទាល់លើកដំបូងលើផែនការសន្តិភាពចុងក្រោយរបស់សហរដ្ឋអាមេរិក

អ្នកចរចាមកពីប្រទេសរុស្ស៊ី អ៊ុយក្រែន និងសហរដ្ឋអាមេរិក បានជួបប្រជុំគ្នាកាលពីថ្ងៃសុក្រ នៅទីក្រុង Abu Dhabi ប្រទេសអារ៉ាប់រួម សម្រាប់ការចរចាដោយផ្ទាល់លើកដំបូងលើផែនការមួយ ដែលត្រូវបានជំរុញដោយប្រធានាធិបតីសហរដ្ឋអាមេរិក លោក Donald Trump ដើម្បីបញ្ចប់សង្គ្រាមរយៈពេលជិតបួនឆ្នាំមកនេះ។ ដំបូងឡើយ សហរដ្ឋអាមេរិកបានរៀបចំផែនការមួយដើម្បីបញ្ចប់ជម្លោះ ដែលត្រូវបានរិះគន់យ៉ាងខ្លាំងនៅក្នុងទីក្រុងគីវនិងអឺរ៉ុបខាងលិចសម្រាប់ការខិតទៅជិតខ្សែបន្ទាត់របស់រុស្ស៊ីពេក ខណៈសំណើក្រោយមកទៀតត្រូវបានរិះគន់ដោយទីក្រុងមូស្គូ ចំពោះការលើកឡើងពីគំនិតនៃកងរក្សាសន្តិភាពអឺរ៉ុប។ មុនការចរចាកាលពីថ្ងៃសុក្រ ដែលគ្រោងនឹងបន្តរហូតដល់ថ្ងៃសៅរ៍នេះ ប្រធានាធិបតីអ៊ុយក្រែន លោក Volodymyr Zelenskyy បាននិយាយថា ទឹកដីនៅតែជាបញ្ហាសំខាន់ ដោយទីក្រុងមូស្គូ បាននិយាយថាមិនបោះបង់ចោលការទាមទាររបស់ខ្លួន ដែលទីក្រុងគីវដកខ្លួនចេញពីតំបន់ Donbas ភាគខាងកើតឡើយ។

បន្ទាប់ពីថ្ងៃដំបូងនៃកិច្ចចរចា ប្រធានអ្នកចរចារបស់អ៊ុយក្រែន លោក Rustem Umerov បានបង្ហោះនៅលើបណ្តាញផ្សព្វផ្សាយសង្គមថា កិច្ចប្រជុំនេះបានផ្តោតលើ «ដែនកំណត់សម្រាប់ការបញ្ចប់សង្គ្រាមរបស់រុស្ស៊ី និងហេតុផលបន្ថែមទៀតនៃដំណើរការចរចា» ខណៈ កិច្ចប្រជុំត្រូវបានគ្រោងទុកសម្រាប់ថ្ងៃសៅរ៍នេះ។ ក្រសួងការបរទេសអារ៉ាប់រួម (UAE) បាននិយាយនៅក្នុងសេចក្តីថ្លែងការណ៍មុននេះថា កិច្ចចរចាត្រូវបានគ្រោងនឹងមានរយៈពេលពីរថ្ងៃ ហើយវាជាផ្នែកមួយនៃកិច្ចខិតខំប្រឹងប្រែងជាបន្តបន្ទាប់ដើម្បីជំរុញកិច្ចសន្ទនានិងកំណត់ដំណោះស្រាយនយោបាយចំពោះវិបត្តិនេះ។ លោក Trump បានជួបជាមួយលោក Zelenskyy នៅឯវេទិកាសេដ្ឋកិច្ចពិភពលោកក្នុងទីក្រុង Davos ប្រទេសស្វីស កាលពីថ្ងៃព្រហស្បតិ៍ ហើយក្រោយមក លោក Steve Witkoff បេសកជនសហរដ្ឋអាមេរិក បានជួបពិភាក្សាជាមួយលោក Vladimir Putin នៅវិមានក្រឹមឡាំង។ កិច្ចប្រជុំនៅអារ៉ាប់រួមបានធ្វើឡើង ខណៈមនុស្សរាប់ពាន់នាក់នៅទីក្រុងគីវ គ្មានម៉ាស៊ីនកម្តៅក្នុងសីតុណ្ហភាពក្រោមសូន្យអង្សាសេ ដោយសារតែការវាយប្រហាររបស់រុស្ស៊ី។