ក្រុមហេសបូឡា តែងតាំង លោក ណាអ៊ីម កាស្សេម ជាមេដឹកនាំថ្មី ខណៈអ៊ីស្រាអែលថានឹងគ្មានរយៈពេលយូរឡើយ

ក្រុមហេសបូឡា តែងតាំង លោក ណាអ៊ីម កាស្សេម ជាមេដឹកនាំថ្មី ខណៈអ៊ីស្រាអែលថានឹងគ្មានរយៈពេលយូរឡើយ
ក្រុមប្រដាប់អាវុធលីបង់ហេសបូឡា បានតែងតាំងលោក ណាអ៊ីម កាស្សេម(Naim Qassem) ជាមេដឹកនាំថ្មីរបស់ខ្លួន កាលពីថ្ងៃអង្គារ ទី២៩ ខែតុលា ប៉ុន្តែអ៊ីស្រាអែល បាននិយាយថា ការកាន់តំណែងរបស់លោកនឹង «បណ្តោះអាសន្ន» ជាការគំរាមកំហែងជាក់ស្តែង បន្ទាប់ពីអ៊ីស្រាអែល បានសម្លាប់អ្នកបន្តតំណែងមុន លោក Hassan Nasrallah ក្នុងទីក្រុងបេរូត កាលពីជាងមួយខែកន្លងទៅនេះ។
រដ្ឋមន្ត្រីការពារជាតិអ៊ីស្រាអែល លោក យ៉ូ អាវ ហ្គាលែន(Yoav Gallant) បានបង្ហោះនៅលើបណ្តាញ X ជាមួយនឹងរូបថត លោក កាស្សេម(Qassem) ថា «ការតែងតាំងបណ្តោះអាសន្ននេះ នឹងមិនយូរឡើយ។
កាលពីពេលមុននេះ ក្រុមហេសបូឡាគាំទ្រដោយអ៊ីរ៉ង់ បាននិយាយនៅក្នុងសេចក្តីថ្លែងការណ៍ថា ក្រុមប្រឹក្សា Shura របស់ខ្លួនបានជ្រើសរើស លោក Qassem អាយុ៧១ឆ្នាំ ស្របតាមយន្តការដែលបានបង្កើតឡើងរបស់ខ្លួន សម្រាប់ការជ្រើសរើសអគ្គលេខាធិការ។
លោក Qassem ត្រូវបានតែងតាំងជាអនុប្រធានក្រុមហេសបូឡាក្នុងឆ្នាំ១៩៩១ ដោយអគ្គលេខាធិការក្រុមប្រដាប់អាវុធ លោក Abbas al-Musawi ដែលត្រូវបានសម្លាប់ក្នុងការវាយប្រហាររបស់អ៊ីស្រាអែល។
លោក Qassem នៅតែស្ថិតក្នុងតួនាទីរបស់លោក នៅពេលដែល លោក Nasrallah ក្លាយជាមេដឹកនាំ ហើយជាអ្នកនាំពាក្យឈានមុខរបស់ក្រុមហេសបូឡា ដោយបានផ្តល់បទសម្ភាសន៍ជាមួយប្រព័ន្ធផ្សព្វផ្សាយបរទេស រួមទាំងការបង្កអរិភាពឆ្លងព្រំដែនជាមួយអ៊ីស្រាអែល ដែលបានផ្ទុះឡើងកាលពីឆ្នាំមុន។