Category: ព័ត៌មានជាតិ​

លោកប្រធានាធិបតីអាមេរិក Joe Biden បាននិយាយកាលពីថ្ងៃអង្គារទី ១៣ ខែសីហាថា ការលុកលុយយោធារបស់អ៊ុយក្រែនចូលទៅក្នុងប្រទេសរុស្ស៊ី បានបង្កើតជាទ្វេគ្រោះពិតប្រាកដសម្រាប់លោកប្រធានាធិបតីរុស្ស៊ី លោក Vladimir Putin ដោយបន្ថែមថាក្រុមមន្ត្រីអាមេរិកកំពុងតាមដានស្ថានការយ៉ាងដិតដល់ចំពោះសកម្មភាពរបស់អ៊ុយក្រែន។ មួយសប្តាហ៍បន្ទាប់ពីទាហានអ៊ុយក្រែនប្រហែល ១.០០០នាក់ បានឆ្លងព្រំដែនរុស្ស៊ីកាលពីព្រឹកព្រលឹមថ្ងៃទី ៦ខែសីហា អមដោយរថក្រោះ និងរថពាសដែក ក្រុមមន្ត្រីសហរដ្ឋអាមេរិកបាននិយាយថា ពួកគេនៅតែស្វែងរកដើម្បីសិក្សាពីអ្វីដែលអ៊ុយក្រែនចង់សម្រេចបានជាមួយនឹងការលុកលុយរបស់ខ្លួន។ ខណៈកំពុងឆ្លើយសំណួររបស់អ្នកសារព័ត៌មានពេលមកដល់ទីក្រុង New Orleans លោក Biden បាននិយាយថា លោកត្រូវបានគេផ្ដល់សេចក្ដីរាយការណ៍រៀងរាល់ ៤ ទៅ ៥ ម៉ោង ម្ដងសម្រាប់រយៈពេល ៦ ទៅ៨ ថ្ងៃចុងក្រោយអំពីសកម្មភាពរបស់អ៊ុយក្រែន។ លោកបាននិយាយនៅក្នុងការអត្ថាធិប្បាយសំខាន់ៗដំបូងរបស់លោកអំពីប្រតិបត្តិការនេះថា ស្ថានការណ៍នេះ កំពុងបង្កើតភាពទ្វេគ្រោះ ឬការលំបាកខ្លាំងយ៉ាងពិតប្រាកដសម្រាប់លោក Putin ។ សហរដ្ឋអាមេរិកបានផ្តល់សព្វាវុធតម្លៃរាប់ពាន់លានដុល្លារដល់អ៊ុយក្រែន ភាគច្រើនសម្រាប់គោលបំណងការពារ ខណៈអ៊ុយក្រែនព្យាយាមវាយបកការឈ្លានពានរបស់រុស្ស៊ីកាលពីខែកុម្ភៈឆ្នាំ២០២២ ៕

ខណៈអក្សរ “Z” អាចជានិមិត្តសញ្ញារបស់រុស្ស៊ីនៃការលុកលុយរបស់ខ្លួន សញ្ញាត្រីកោណមួយ តំណាងឱ្យការប៉ុនប៉ងដ៏ក្លាហានបំផុតរបស់អ៊ុយក្រែនក្នុងការវាយបក។ សញ្ញាតំណាងទាំងនោះត្រូវបានបិទភ្ជាប់ ឬលាបពណ៌នៅសងខាងគ្រប់រថយន្តផ្គត់ផ្គង់ រថក្រោះ ឬក្រុមហ៊ុនដឹកជញ្ជូនបុគ្គលិក ដែលធ្វើដំណើរឆ្ពោះទៅព្រំដែនរុស្ស៊ីក្នុងតំបន់ Sumy។ នេះជាការវាយលុកមួយដែលបានដណ្តើមយកទឹកដីរុស្ស៊ីរាប់រយគីឡូម៉ែត្រក្រឡា និងបានស្តារសន្ទុះ និងស្មារតីឡើងវិញចំពោះកិច្ចប្រឹងប្រែងសង្គ្រាមរបស់អ៊ុយក្រែន។ មន្ត្រីរុស្ស៊ីទទួលបន្ទុកតំបន់ព្រំដែនឃើស(Kursk) បាននិយាយថា ពេលនេះភូមិចំនួន២៨ស្ថិត ក្រោមការគ្រប់គ្រងរបស់អ៊ុយក្រែន ហើយប្រជាជនរុស្ស៊ីជិត២០០.០០០នាក់ បានភៀសខ្លួនចេញពីផ្ទះរបស់ពួកគេ។ តាមរយៈ Telegram កងទ័ពម្នាក់ដែលកំពុងស្ថិតក្នុងទឹកដីរុស្ស៊ីនៅឡើយ បាននិយាយថាយើងមានការភ្ញាក់ផ្អើលណាស់ នៅពេលយើងបានរុលចូលក្នុងដែនដីរុស្ស៊ីយ៉ាងងាយស្រួល។ យោធាអ៊ុយក្រែនបានបង្ហោះវីដេអូនៅលើបណ្ដាញសង្គម កាលពីថ្ងៃអង្គារ បង្ហាញពីទាហានអ៊ុយក្រែនឈរក្រោមស្លាកសញ្ញាបង្ហាញផ្លូវនៅក្នុងតំបន់ឃើស របស់រុស្ស៊ី ស្របពេលការលុកលុយនៅតែបន្ត៕

ប្រធានាធិបតីអាមេរិក លោក ចូ បៃដិន (Joe Biden) បាននិយាយកាលពីថ្ងៃអង្គារ (១៣ សីហា) ថា កិច្ចព្រមព្រៀងបទឈប់បាញ់នៅតំបន់ហ្កាហ្សា អាចរារាំងអ៊ីរ៉ង់ ពីការវាយប្រហារលើអ៊ីស្រាអែល ក្នុងការសងសឹកចំពោះការសម្លាប់មេដឹកនាំក្រុមហាម៉ាស ដែលបានធ្វើឱ្យភាពតានតឹងក្នុងតំបន់កើនឡើងខ្លាំង។ ការលើកឡើងរបស់លោកបានធ្វើឡើងបន្ទាប់ពីអ៊ីរ៉ង់ បានច្រានចោលការអំពាវនាវរបស់លោកខាងលិច ឱ្យ«បន្ធូរបន្ថយ» ការគំរាមកំហែងនៃការសងសឹករបស់ខ្លួន។ សាធារណរដ្ឋអ៊ីស្លាមមួយនេះ និងសម្ព័ន្ធមិត្តរបស់ខ្លួនបានស្តីបន្ទោសអ៊ីស្រាអែលចំពោះការសម្លាប់ លោក អ៊ីស្មេល ហានីយេ (Ismail Haniyeh) កាលពីថ្ងៃទី៣១ ខែកក្កដា នៅទីក្រុងតេអេរ៉ង់ ខណៈអ៊ីស្រាអែលមិនបានធ្វើអត្ថាធិប្បាយលើរឿងនោះទេ។ អ៊ីរ៉ង់បានប្តេជ្ញាសងសឹកយ៉ាងចាស់ដៃចំពោះការស្លាប់នេះ។ នៅពេលត្រូវសាកសួរថា តើបទឈប់បាញ់រវាងអ៊ីស្រាអែល និងក្រុមហាម៉ាស អាចទប់ទល់នឹងការវាយលុករបស់អ៊ីរ៉ង់ដែរឬទេ លោក Biden បានឆ្លើយថា «នោះជាការរំពឹងទុករបស់ខ្ញុំ»។ លោកបានប្រាប់អ្នកយកព័ត៌មាននៅទីក្រុង ញូវស៍ អលីនស៍ (New Orleans) ថា៖ ទោះជាការចរចាកំពុងស្ថិតក្នុង «ស្ថានភាពពិបាក» ក៏លោក «នៅតែមិនបោះបង់ឡើយ»។ អ្នកការទូតលោកខាងលិចបានព្យាយាមទប់ស្កាត់ជម្លោះដ៏ធំមួយនៅមជ្ឈិមបូព៌ា ដែលភាពតានតឹងបានកើនឡើងខ្ពស់រួចទៅហើយ ដោយសារតែសង្គ្រាមអ៊ីស្រាអែល និងក្រុមហាម៉ាសនៅតំបន់ហ្កាហ្សា។ សេតវិមានបានព្រមានថា «ការវាយប្រហារដ៏ធំជាច្រើន»…

ស្ថាប័ននគរបាលជាតិបាននិយាយកាលពីថ្ងៃអង្គារ (១៣ សីហា) ថា អាជ្ញាធរចក្រភពអង់គ្លេស បានចាប់ខ្លួនមនុស្សជាង ១.០០០នាក់ បន្ទាប់ពីកុបកម្មជាច្រើនថ្ងៃដែលពាក់ព័ន្ធនឹងអំពើហិង្សា ការដុតដោយចេតនា និងចោរកម្មក្នុងហាងទំនិញ ក៏ដូចជាការវាយប្រហាររើសអើងជាតិសាសន៍ទៅលើជនជាតិមូស្លីម និងជនអន្តោប្រវេសន៍។ អំពើហិង្សាបានផ្ទុះឡើងនៅក្នុងទីក្រុងនានាទូទាំងដែនដីអង់គ្លេស និងក្នុងអៀរឡង់ខាងជើងផងដែរ ប៉ុន្តែមានករណីនៃភាពចលាចលតិចជាងមុនចាប់តាំងពីសប្តាហ៍មុនមក បន្ទាប់ពីនគរបាលបង្កើនកិច្ចខិតខំប្រឹងប្រែងដើម្បីកំណត់អត្តសញ្ញាណអ្នកពាក់ព័ន្ធក្នុងកុបកម្ម។ ក្រុមប្រឹក្សាស្នងការនគរបាលជាតិ បាននិយាយនៅក្នុងការធ្វើបច្ចុប្បន្នភាពចុងក្រោយរបស់ខ្លួនថា មនុស្ស ១.០២៤នាក់ត្រូវបានចាប់ខ្លួន និង ៥៧៥នាក់ត្រូវបានចោទប្រកាន់នៅទូទាំងចក្រភពអង់គ្លេស។ មនុស្សជាច្រើនត្រូវបានចាប់ដាក់ពន្ធនាគារ ហើយអ្នកខ្លះត្រូវបានកាត់ឱ្យជាប់ទោសរយៈពេលយូរ។ កុបកម្ម ដែលបានធ្វើឡើងបន្ទាប់ពីការសម្លាប់ក្មេងស្រីបីនាក់នៅក្នុងទីក្រុង សៅផត (Southport) ភាគខាងជើងអង់គ្លេស បានចាប់ផ្តើមបន្ទាប់ពីការវាយប្រហារកាលពីថ្ងៃទី២៩ ខែកក្កដានេះ ដោយត្រូវបានស្តីបន្ទោសដោយច្រឡំលើជនអន្តោប្រវេសន៍អ៊ីស្លាម ផ្អែកលើព័ត៌មានមិនពិតតាមអ៊ីនធឺណិត។ លើកចុងក្រោយដែលចក្រភពអង់គ្លេស បានមើលឃើញកុបកម្មដ៏រីករាលដាលគឺនៅក្នុងឆ្នាំ២០១១ នៅពេលដែលនគរបាលបាញ់សម្លាប់បុរសស្បែកខ្មៅម្នាក់ បានបង្កឱ្យមានអំពើហិង្សានៅតាមដងផ្លូវជាច្រើនថ្ងៃ៕

យោងតាមការព្យាករណ៍របស់ក្រសួងធនធានទឹក និងឧតុនិយម បានឲ្យដឹងថា តំបន់វាលទំនាប អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់គ្របដណ្ដប់លើផ្ទៃដី ១៥% ។ តំបន់ខ្ពង់រាប គ្របដណ្ដប់លើផ្ទៃដី ៥% និង តំបន់មាត់សមុទ្រ គ្របដណ្ដប់លើផ្ទៃដី១០%។ ការប្រែប្រួលអាកាសធាតុដែលអាចមានភ្លៀងធ្លាក់នេះគឺអាស្រ័យដោយ ខ្យល់មូសុងនិរតី ថយឥទ្ធិពល ខណៈសម្ពាធទាបគ្របដណ្តប់លើសមុទ្រចិនខាងត្បូង ភាគកណ្តាលនៃអាងទន្លេមេគង្គ និងលើព្រះរាជាណាចក្រកម្ពុជា។ ស្ថានភាពបែបនេះចាប់ពីថ្ងៃទី១៤ ដល់ថ្ងៃទី១៦ ខែសីហា ឆ្នាំ២០២៤។ ទន្ទឹងនេះទៀត កម្ពុជាត្រូវបានគេព្យាករណ៍ថា ទទួលរងការប្រែប្រួលអាកាសធាតុ ដែលតំបន់វាលទំនាប នឹងមានសីតុណ្ហភាពអប្បបរមា២៣°C និងសីតុណ្ហភាពអតិបរមា៣៥°C។ ដោយឡែក សម្រាប់តំបន់ខ្ពង់រាប នឹងមានសីតុណ្ហភាពអប្បបរមា២៣°C និងសីតុណ្ហភាពអតិបរមា៣៤°C។ ចំណែកឯ តំបន់មាត់សមុទ្រវិញ នឹងមានសីតុណ្ហភាពអប្បបរមា២៣°C និងសីតុណ្ហភាពអតិបរមា៣៣°C។ ជាមួយគ្នានោះតំបន់មាត់សមុទ្រ រលកសមុទ្រមានកម្ពស់មធ្យមអប្បបរមា ០,៥០ម៉ែត្រ និងកម្ពស់មធ្យមអតិបរមា ១,២៥ម៉ែត្រ៕

រដ្ឋមន្ត្រីការបរទេសចិន លោក វ៉ាង យី (Wang Yi) កាលពីថ្ងៃចន្ទ (១២ សីហា) បានអំពាវនាវឱ្យមានកិច្ចខិតខំប្រឹងប្រែងរួមគ្នារបស់ប្រទេសចិន និងសមាគមប្រជាជាតិអាស៊ីអាគ្នេយ៍ (អាស៊ាន) ដើម្បីពន្លឿនការអភិវឌ្ឍន៍បែបសម្របសម្រួល និងជំរុញកម្លាំងផលិតភាពប្រកបដោយគុណភាពថ្មីនៅទូទាំងតំបន់។ លោក Wang ដែលជាសមាជិកនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន (CPC) បានធ្វើការលើកឡើងនេះនៅក្នុងលិខិតអបអរសាទរទៅកាន់ពិធីសប្តាហ៍នៃអាស៊ាន-ចិនឆ្នាំ២០២៤។ ពិធីបើកព្រឹត្តិការណ៍នេះត្រូវបានប្រារព្ធឡើងកាលពីថ្ងៃចន្ទ នៅទីក្រុង ឆាងជឺ (Changzhi) ខេត្ត សានស៊ី (Shanxi) ភាគខាងជើងប្រទេសចិន។ លោក Wang បាននិយាយថា ចាប់តាំងពីការបង្កើតភាពជាដៃគូយុទ្ធសាស្ត្រលើគ្រប់ជ្រុងជ្រោយរវាងចិន-អាស៊ានមក វឌ្ឍនភាពដ៏រឹងមាំត្រូវបានបង្កើតឡើងក្នុងការកសាងសហគមន៍ចិន-អាស៊ានជាមួយនឹងអនាគតរួមគ្នា។ ដោយសង្កត់ធ្ងន់លើសក្តានុពលគ្មានដែនកំណត់នៃទំនាក់ទំនងចិន-អាស៊ាន លោក Wang បានអំពាវនាវឱ្យភាគីទាំងពីរស្វះស្វែងរកការពង្រីកជាបន្តបន្ទាប់នៃផ្នែកថ្មីនៃកិច្ចសហប្រតិបត្តិការ និងចាប់យកឱកាសនៃជុំថ្មីនៃបដិវត្តន៍បច្ចេកវិទ្យា និងឧស្សាហកម្មដើម្បីភាពរីកចម្រើនរួមគ្នា៕

ក្រុមកងជីវពលស៊ីអ៊ីតអ៊ីរ៉ាក់ បានព្រមានសហរដ្ឋអាមេរិកកាលពីថ្ងៃចន្ទអំពីការសងសឹក «គ្មានដែនកំណត់” ប្រសិនបើប្រទេសនេះ វាយប្រហារអ៊ីរ៉ាក់ ឬអ៊ីរ៉ង់នោះ។ គណៈកម្មាធិការសម្របសម្រួលការតស៊ូរបស់អ៊ីរ៉ាក់ (IRCC) តំណាងឲ្យក្រុមអ្នកតស៊ូឥស្លាមនៅអ៊ីរ៉ាក់ បាននិយាយថា ខ្លួននឹងមិនត្រូវបានរារាំងដោយការដាក់កម្រិតណាមួយឡើយ ប្រសិនបើកងកម្លាំងសហរដ្ឋអាមេរិក តម្រង់គោលដៅលើបុគ្គលិកអ៊ីរ៉ាក់ ឬប្រើប្រាស់ដែនអាកាសអ៊ីរ៉ាក់ ដើម្បីវាយប្រហារអ៊ីរ៉ង់។ ការគម្រាមកំហែងនេះ កើតឡើង ស្របពេលមានភាពតានតឹងក្នុងតំបន់ កើនឡើង ដោយអ៊ីរ៉ង់ និងសម្ព័ន្ធមិត្តបានសន្យាសងសឹកចំពោះការសម្លាប់នាពេលថ្មីៗនេះរបស់ប្រធានការិយាល័យនយោបាយហាម៉ាស លោក អ៊ីស្មេល ហានីយេ ( Ismail Haniyeh) នៅទីក្រុងតេអេរ៉ង់ និងមេបញ្ជាការហេសបូឡា លោក Fouad Shokor ក្នុងទីក្រុងបេរូតដែលទាំងពីរ បានកើតឡើង នៅចុងខែកក្កដា។ ជាការឆ្លើយតបទៅនឹងការគំរាមកំហែង ដែលកំពុងកើនឡើងនេះ ទីក្រុងវ៉ាស៊ីនតោន បាននិយាយថា ខ្លួនប្តេជ្ញាការពារអ៊ីស្រាអែល ប្រសិនបើជម្លោះដ៏ធំមួយ កើតឡើង ហើយកំពុងបញ្ជូន «កងទ័ពបន្ថែមទៀត និងគ្រឿងយុទ្ធោបករណ៍បន្ថែមទៅកាន់មជ្ឈិមបូព៌ា»។

ភ្នំពេញ៖ សមាគមសម្ព័ន្ធខ្មែរចិន នៅកម្ពុជា និងគណៈប្រតិភូមកពីរដ្ឋបាលទីក្រុងសានថូវ ប្រទេស​ចិន បានសហការគ្នារៀបចំសន្និសីទជំរុញកិច្ចសហប្រតិបត្តិការពាណិជ្ជកម្ម និងផ្លាស់ប្តូរវប្បធម៌ ក្នុង​គោលបំណងដើម្បីរួមចំណែក ក្នុងការស្វែងរកកាលានុវត្តភាពថ្មី សម្រាប់​ពង្រឹង និង​ពង្រីក​កិច្ច​សហ​ប្រតិបត្តិការផ្នែកធុរកិច្ច និងវិនិយោគនៅកម្ពុជា ពិសេសផ្តោតសំខាន់លើវិស័យទេសចរណ៏ អចលទ្រព្យ ហេដ្ឋារចនា សម្ព័ន្ធរូបវន្ត សេវាកម្ម វាយនភណ្ឌ ពាណិជ្ជកម្ម និង​ឧស្សាហកម្ម​មួយ​ចំនួន​ទៀត​។ សន្និសីទនេះ បានប្រារព្ធធ្វើឡើងនៅរសៀលថ្ងៃទី១៣ ខែសីហា ឆ្នាំ២០២៤ នៅអគារ City Hall កោះពេជ្រ ក្រោមវត្តមានរបស់ ឯកឧត្តម សេង វណ្ណៈ អភិបាលរង នៃគណៈ​អភិបាល​រាជ​ធានី​ភ្នំពេញ , ឯកឧត្តម ជិន ឆុង អគ្គទីប្រឹក្សានៃស្ថានទូតចិនប្រចាំនៅកម្ពុជា និងមានការ​ចូលរួម​ពី​ភ្ញៀវ​កិត្តិយ​ស​ជាតិ និងអន្តរជាតិជាច្រើនរូប។ ក្នុងឱកាសនោះ លោកអ្នកឧកញ៉ា ពុង ឃាវសែ ប្រធានសមាគមសម្ព័ន្ធខ្មែរចិន នៅកម្ពុជា បាន​ជំរាប​ជូន​អង្គប្រជុំឲ្យបានជ្រាបថា កម្ពុជា ជាប្រទេសសមាជិកអាស៊ាន ដែលមាន​គោល​នយោបាយ​សេដ្ឋកិច្ច​បើក​ចំហរកម្រិតខ្ពស់មួយនៅតំបន់អាស៊ីអាគ្នេយ៍ ដែលមានគុណសម្បត្តិចម្បងៗដូចជា មាន​ទីតាំងភូមិសាស្រ្តដ៏ល្អប្រសើរ គ្មានខ្យល់ព្យុះ មិនមានគ្រោះរញ្ជួយដី…

ឯកអគ្គរដ្ឋទូតអាមេរិក ប្រចាំនៅទួរគី បាននិយាយថា សហរដ្ឋអាមេរិក កំពុងស្នើឱ្យទួរគី និងសម្ព័ន្ធមិត្តផ្សេងទៀតដែលមានទំនាក់ទំនងជាមួយអ៊ីរ៉ង់ ឱ្យបញ្ចុះបញ្ចូលរដ្ឋអ៊ិស្លាមមួយនេះដើម្បីកាត់បន្ថយភាពតានតឹងនៅមជ្ឈិមបូព៌ា។ ឯកអគ្គរដ្ឋទូត លោក ជេហ្វ ហ្វ្លេក (Jeff Flake) បានធ្វើការលើកឡើងបែបនេះ ខណៈតំបន់កំពុងត្រៀមទប់ទល់ការវាយប្រហារដែលអាចកើតមានដោយអ៊ីរ៉ង់ និងសម្ព័ន្ធមិត្ត បន្ទាប់ពីការសម្លាប់សមាជិកជាន់ខ្ពស់នៃក្រុមហាម៉ាស និងហេសបូឡា។ លោក Ismail Haniyeh មេដឹកនាំនយោបាយនៃក្រុមហាម៉ាសគាំទ្រដោយអ៊ីរ៉ង់ ត្រូវបានគេធ្វើឃាតនៅក្នុងរដ្ឋធានីរបស់អ៊ីរ៉ង់ កាលពីថ្ងៃទី៣១ កក្កដា ដែលបង្កឱ្យមានការគំរាមកំហែងនៃការសងសឹកដោយអ៊ីរ៉ង់ប្រឆាំងនឹងអ៊ីស្រាអែល ដែលកំពុងប្រយុទ្ធជាមួយក្រុមអ៊ីស្លាមប៉ាឡេស្ទីននៅតំបន់ហ្កាហ្សា។ អ៊ីរ៉ង់បានស្តីបន្ទោសអ៊ីស្រាអែលចំពោះការសម្លាប់នេះ ខណៈអ៊ីស្រាអែលមិនបានអះអាងទទួលខុសត្រូវឡើយ។ លោក Flake បាននិយាយជាមួយអ្នកសារព័ត៌មានក្នុងទីក្រុងអ៊ីស្តង់ប៊ុលថា «យើងស្នើឱ្យសម្ព័ន្ធមិត្តរបស់យើងទាំងអស់ដែលមានទំនាក់ទំនងជាមួយអ៊ីរ៉ង់ បញ្ជុះបញ្ជូលពួកគេឱ្យបន្ធូរបន្ថយកំណើនភាពតានតឹង ហើយរួមទាំងប្រទេសទួរគីផងដែរ»។ ទំនាក់ទំនងរវាងអាមេរិក និងទួរគី មានភាពតានតឹងក្នុងពេលប៉ុន្មានឆ្នាំចុងក្រោយនេះ ដោយសារសម្ព័ន្ធភាពអាមេរិក ជាមួយជនជាតិឃឺដនៅស៊ីរី ដែលទួរគីចាត់ទុកជាភេរវករ និងជុំវិញការទិញប្រព័ន្ធការពារ S-400 របស់ទួរគី ដែលជំរុញឱ្យអាមេរិកដាក់ទណ្ឌកម្ម និងការដកខ្លួនចេញពីកម្មវិធីយន្តហោះ F-35។ ទោះជាយ៉ាងណាក្ដី លោក Flake បាននិយាយថា លោកគិតថា ទំនាក់ទំនងរវាងអាមេរិក និងទួរគី នៅពេលនេះ…