សត្វជ្រូកទឹក បានបង្ហាញវត្តមាន វិលត្រឡប់មកវិញហើយ នៅប្រជុំកោះកែប

សត្វជ្រូកទឹក បានបង្ហាញវត្តមាន វិលត្រឡប់មកវិញហើយ នៅប្រជុំកោះកែប

(ភ្នំពេញ)៖ នៅថ្ងៃទី០២ ខែកញ្ញា ឆ្នាំ២០២៥នេះ គេបានបានប្រទះឃើញ​មាន​វត្តមាន​សត្វជ្រូកទឹក ស្ថិតនៅក្នុងតំបន់គ្រប់គ្រងជលផលសមុទ្រ ប្រជុំកោះកែប ។នេះបើតាមការឱ្យដឹងពីសំណាក់អង្គការអភិរក្សសមុទ្រកម្ពុជា( MCC)។

អង្គការអភិរក្សសមុទ្រកម្ពុជា( MCC) បានឱ្យដឹងនៅថ្ងៃទី ២ ខែកញ្ញា ឆ្នាំ ២០២៥​នេះ​ថា ក្នុងអំឡុងពេលចុះស្រាវជ្រាវនៅបាតសមុទ្រ ក្នុងនេះអង្គការMCC បាន​កំណត់​សម្គាល់ឃើញនូវដានជ្រូកទឹកស៊ីចំណីថ្មីៗនៅក្នុងតំបន់ស្មៅកាក់សមុទ្រ Halophila sp. ដែលជាចំណីរបស់ជ្រូកទឹកចូលចិត្តស៊ី។

ជុំវិញបញ្ហានេះអង្គការអភិរក្សសមុទ្រកម្ពុជាបានលើកឡើងថា”វាជារឿងដ៏គួរឱ្យភ្ញាក់ផ្អើលទៀតនោះ ប៉ុន្មានថ្ងៃក្រោយមក យើងក៏បានអង្កេតឃើញមានការលេចឡើង​របស់ជ្រូកទឹកម្តងទៀតក្នុងអំឡុងពេលបង្ហោះដ្រូន (drone) អស់ប្រមាណ​ជា​ច្រើន​ខែមកហើយ”។

ការត្រឡប់មកវិញរបស់​ជ្រូកទឹកនេះ គឺជាសមិទ្ធផលមួយ នៃកិច្ច​ខិតខំប្រឹងប្រែង​អភិរក្ស​រួមគ្នារបស់អង្គការអភិរក្សសមុទ្រកម្ពុជា MCC និងរដ្ឋបាល​ជលផល។ ពិសេស​​ជាងនេះទៅទៀតនោះដោយមានការរីកលូតលាស់​ឡើងវិញ​របស់​ស្មៅ​សមុទ្រ ដែលជាចំណីចម្បងរបស់ពួកគេក្នុងការរស់រានមានជីវិត។

អង្គការអភិរក្សសមុទ្រកម្ពុជា( MCC)បានឱ្យដឹងដែរថា ទោះបីយ៉ាងណាក៏ដោយ វិធី​សាស្រ្ត​នេសាទមួយចំនួនដែលបានជះឥទ្ធិពលអវិជ្ជមានទៅដល់ប្រភេទជីវៈចម្រុះ​នៅ​តែបន្តឃើញមានសកម្មភាពនៅក្នុងតំបន់នេះ ដែលជាហេតុធ្វើឱ្យមានការគម្រាម​កំហែង​យ៉ាងធ្ងន់ធ្ងរទៅដល់ថនិកសត្វប្រភេទនេះ និងជម្រករបស់ពួកវាផងដែរ។ស្រប​ពេលដែលមានការខិតខំប្រឹងប្រែងជាច្រើនត្រូវបានអនុវត្តរួចហើយ ប៉ុន្តែយើង​ក៏ត្រូវ​តែ​​បន្តយកចិត្តទុកដាក់បន្ថែមទៀតដើម្បីរកដំណោះស្រាយចំពោះផលប៉ះពាល់ និង​ធានា​បាននូវបរិស្ថានដ៏មានសុវត្ថិភាពសម្រាប់សត្វជ្រូកទឹកក្នុងដែនសមុទ្រកម្ពុជា​យើង ៕