Category: ព័ត៌មានជាតិ​

ព្យុងយ៉ាង​៖ កូរ៉េខាងជើងបានផ្គត់ផ្គង់ដល់រុស្ស៊ីយ៉ាងជាប់លាប់នូវគ្រាប់កាំភ្លើងធំទំហំ ១៥២មីល្លីម៉ែត្រជាង ១២លានគ្រាប់ ដើម្បីជួយទីក្រុងមូស្គូក្នុងសង្រ្គាមប្រឆាំងនឹងអ៊ុយក្រែន នេះបើតាមសេចក្តីរាយការណ៍របស់សារព័ត៌មាន Yonhap កាលពីថ្ងៃអាទិត្យ ដោយដកស្រង់ប្រភពពីចារកម្មយោធាកូរ៉េខាងត្បូង។ របាយការណ៍ពីទីភ្នាក់ងារស៊ើបការណ៍សម្ងាត់ការពារជាតិកូរ៉េខាងត្បូង ហៅកាត់ (DIA) ដែលចែករំលែកជាមួយសមាជិកសភាមកពីគណបក្សប្រឆាំងដ៏សំខាន់មួយ បានឱ្យដឹងថា កូរ៉េខាងជើងត្រូវបានគេប៉ាន់ប្រមាណថា បានបញ្ជូនទូរកុងតឺន័រចំនួន ២៨.០០០កុងតឺន័រ ផ្ទុកដោយសព្វាវុធ និងគ្រាប់កាំភ្លើងធំទៅឱ្យរុស្ស៊ី។ ទីភ្នាក់ងារ DIA ដែលស្ថិតក្រោមក្រសួងការពារជាតិកូរ៉េខាងត្បូងនេះ បន្ថែមថា បើសិនគណនាតែសំបកគ្រាប់កាំភ្លើងធំទំហំ ១៥២មីលីម៉ែត្រ គេជឿជាក់ថា មានចំនួនដល់ទៅជាង ១២លានគ្រាប់។ រីឯកាលពីចុងខែមិថុនា ទីភ្នាក់ងារស៊ើបការណ៍សម្ងាត់កូរ៉េខាងត្បូង បានអះអាងថា កូរ៉េខាងជើងទំនងជានឹងបញ្ជូនទាហានបន្ថែមទៀតទៅកាន់ប្រទេសរុស្ស៊ីក្នុងរយៈពេលពីរខែខាងមុខទៀត។ កូរ៉េខាងជើងបានពង្រាយពលទាហានរាប់ពាន់នាក់ ដើម្បីជួយច្បាំងរុស្ស៊ីក្នុងសង្គ្រាមប្រឆាំងអ៊ុយក្រែន បន្ទាប់ពីការចុះហត្ថលេខាលើសន្ធិសញ្ញាភាពជាដៃគូយុទ្ធសាស្ត្រដោយមេដឹកនាំកូរ៉េខាងជើង លោក គីម ជុងអ៊ុន និងលោកប្រធានាធិបតីរុស្ស៊ី វ្ល៉ាឌីមៀ ពូទីន នៅទីក្រុងព្យុងយ៉ាង ក្នុងខែមិថុនា ឆ្នាំ ២០២៤។ បើតាមការបញ្ជាក់របស់លោកប្រធានសន្តិសុខរុស្ស៊ី Shoigu កូរ៉េខាងជើងនឹងបញ្ជូនពលទាហានចំនួន ៦.០០០នាក់ទៅរុស្ស៊ី រួមទាំងវិស្វករប្រយុទ្ធ ១.០០០ នាក់ និងអ្នកសាងសង់យោធា ៥.០០នាក់ ក្នុងគោលបំណងជួយបោសសម្អាតគ្រាប់មីន…

វ៉ាស៊ីនតោន ៖ មេដឹកនាំអាមេរិកនិយាយថា លោកនឹងបញ្ជូនប្រព័ន្ធការពារដែនអាកាសប៉ាទ្រីយ៉ូតទៅជួយការពារផ្ទៃប្រទេសអ៊ុយក្រែន ពីការវាយប្រហារតាមផ្លូវអាកាសរបស់រុស្ស៊ី ខណៈដែលលោកប្រធានាធិបតី ពូទីន នៅតែចចេសរឹងរូសមិនព្រមបិទបញ្ចប់ការឈ្លានពានទឹកដីអ៊ុយក្រែន។ ប៉ាទ្រីយ៉ូត គឺជាប្រព័ន្ធខែលប្រឆាំងមីស៊ីលដែលបាញ់ចេញពីផ្ទៃដីទៅអាកាស។ វាមានបំពាក់ដោយប្រព័ន្ធរ៉ាដា ស្ថានីយគ្រប់គ្រង ម៉ាស៊ីនភ្លើង ស្ថានីយបាញ់ និងយានគាំទ្រមួយចំនួនទៀត ហើយប្រព័ន្ធអាវុធនេះ មានសមត្ថភាពផ្សេងគ្នាៗ អាស្រ័យទៅលើប្រភេទនៃមីស៊ីលស្ទាក់ចាប់ដែលត្រូវបានប្រើ។ ជាក់ស្តែង មីស៊ីលស្ទាក់ចាប់ PAC-2 បាញ់បានចម្ងាយលើស ១០០គីឡូម៉ែត្រ និងមីស៊ីលស្ទាក់ចាប់ PAC-3 បាញ់បានចម្ងាយអតិបរមា ៦៩គីឡូម៉ែត្រ។ បើតាមមជ្ឈមណ្ឌលសម្រាប់យុទ្ធសាស្ត្រ និងការសិក្សាអន្តរជាតិ (CSIS) ប្រព័ន្ធប៉ាទ្រីយ៉ូត មានតម្លៃជាង ១ពាន់លានដុល្លារ ក្នុងនោះ ៤០០លានដុល្លារសម្រាប់ប្រព័ន្ធ និង៦៩០លានដុល្លារសម្រាប់មីស៊ីល ដោយក្នុងមួយគ្រាប់មានតម្លៃជាង ៤លានដុល្លារ។ លោកប្រធានាធិបតី ដូណាល់ ត្រាំ បានប្រាប់ក្រុមអ្នកសារព័ត៌មាននៅឯមូលដ្ឋានទ័ព Andrews ខាងក្រៅទីក្រុងវ៉ាស៊ីនតោនថា យើងនឹងបញ្ជូនប្រព័ន្ធការពារដែនអាកាស ដែលអ៊ុយក្រែនកំពុងត្រូវការខ្លាំង ពីព្រោះលោកប្រធានាធិបតី ពូទីន ពិតជាធ្វើឱ្យមនុស្សជាច្រើនភ្ញាក់ផ្អើល។ លោកថា លោក ពូទីន បាននិយាយល្អនៅពេលព្រឹក ហើយបន្ទាប់មកគាត់បញ្ជាឱ្យទម្លាក់គ្រាប់បែកលើមនុស្សគ្រប់គ្នានៅពេលល្ងាច។ ខ្ញុំមិនចូលចិត្តទេ…

អឺរ៉ុប និងឥណ្ឌូណេស៊ីឈានដល់កិច្ចព្រមព្រៀងពាណិជ្ជកម្មសេរី ព្រុចសែល ៖ សហភាពអ៊ឺរ៉ុប និងឥណ្ឌូណេស៊ី បានប្រកាសពីកិច្ចព្រមព្រៀងនយោបាយ ដើម្បីបញ្ចប់កិច្ចព្រមព្រៀងពាណិជ្ជកម្មសេរីដែលរង់ចាំជាយូរមកហើយ ខណៈមេដឹកនាំអាមេរិកកំពុងដុតបញ្ឆេះភ្លើងសង្គ្រាមពាណិជ្ជកម្មពិភពលោក។ កិច្ចព្រមព្រៀងត្រូវបានប្រកាសដោយលោកស្រីប្រធានសហភាពអឺរ៉ុប Ursula von der Leyen និងលោកប្រធានាធិបតីឥណ្ឌូណេស៊ី Prabowo Subianto នៅថ្ងៃទី១៣ ខែកក្កដា។ ប្លុកអឺរ៉ុបចំនួន២៧ប្រទេស និងប្រទេសដែលមានសេដ្ឋកិច្ចធំជាងគេនៅអាស៊ីអាគ្នេយ៍ បានចរចាលើកិច្ចព្រមព្រៀងនេះតាំងពីឆ្នាំ២០១៦មកម្ល៉េះ ទើបអាចឈានដល់កិច្ចព្រមព្រៀង ដែលត្រូវបានរំពឹងថា នឹងបង្កើនពាណិជ្ជកម្ម រួមទាំងការវិនិយោគ។ សេចក្តីថ្លែងការណ៍របស់គណៈកម្មការអឺរ៉ុបបានហៅកិច្ចព្រមព្រៀងនេះថា ជា “ព្រឹត្តិការណ៍ដ៏សំខាន់មួយ” ឆ្ពោះទៅរកកិច្ចព្រមព្រៀងដែលនឹងត្រូវបញ្ចប់នៅក្នុងខែកញ្ញា ដោយលោកប្រធានពាណិជ្ជកម្មសហភាពអឺរ៉ុប Maros Sefcovic និងលោករដ្ឋមន្ត្រីសេដ្ឋកិច្ចឥណ្ឌូនេស៊ី Airlangga Hartarto។ សហភាពអឺរ៉ុបបានបង្កើនកិច្ចខិតខំប្រឹងប្រែងកែលម្អទំនាក់ទំនងជាមួយដៃគូសក្តានុពលសំខាន់ៗជុំវិញពិភពលោក ខណៈដែលលោកប្រធានាធិបតី Donald Trump កំពុងដុតបញ្ឆេះភ្លើងសង្គ្រាមពាណិជ្ជកម្មជាមួយនឹងការដំឡើងពន្ធគយ។ អឺរ៉ុបគឺជាដៃគូពាណិជ្ជកម្មធំជាងគេទី៥របស់ឥណ្ឌូណេស៊ី ជាមួយនឹងទំហំពាណិជ្ជកម្មទ្វេភាគីឈានដល់ ៣០.១ ពាន់លានដុល្លារកាលពីឆ្នាំ២០១៤៕ ប្រភព ៖ AFP

សម្តេចធិបតី ហ៊ុន ម៉ាណែត បញ្ជាឱ្យធ្វើវិសោធនកម្មច្បាប់ចំនួនពីរ ពាក់ព័ន្ធនឹងការពង្រឹងវិស័យយោធា (កំពង់ឆ្នាំង)៖ សម្តេចធិបតី នាយឧត្តមសេនីយ៍ ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់ថា ពាក់ព័ន្ធនឹងការពង្រឹងវិស័យយោធា សម្ដេចបានបញ្ជាឱ្យធ្វើវិសោធនកម្មច្បាប់ចំនួនពីរ ក្នុងនោះមានច្បាប់ កាតព្វកិច្ចយោធាឆ្នាំ ២០០៦ ដែលត្រូវធ្វើរួចរាល់ និងដាក់ឱ្យអនុវត្តនៅឆ្នាំ២០២៦ខាងមុខ, ការធ្វើវិសោធនកម្មនេះ ដើម្បីបង្កើនប្រសិទ្ធភាព ក្នុងការបំពេញសាច់ទ័ព ជាពិសេសការបំពេញ ពលទាហានថ្នាក់ក្រោមឱ្យបានគ្រប់គ្រាន់។ ទីពីរការធ្វើវិសោធនកម្មច្បាប់សោធន របស់យោធា ។ សម្តេចធិបតីនាយឧត្តមសេនីយ៍ ហ៊ុន ម៉ាណែត បានបញ្ជាក់បែបនេះ ក្នុងឱកាសអញ្ជើញសម្ពោធ ដាក់ឱ្យប្រើប្រាស់ សមិទ្ធផលនៃមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ និងអបអរសាទរខួបលើក ទី៣២ ទិវាកងរាជអាវុធហត្ថ (១៤ កក្កដា ១៩៩៣-១៤ កក្ដដា ២០២៥) ស្ថិតនៅភូមិច្រកកូវ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង នាព្រឹកថ្ងៃទី១៤ ខែកក្កដា ឆ្នាំ២០២៥ ។ សម្តេចធិបតី បានថ្លែងថា នាពេលថ្មីៗនេះ ទើបមានការប្រជុំចង្អៀតមួយ ក្នុងការធ្វើកំណែទម្រង់កងទ័ព។…

ឯកឧត្តមឧបនាយករដ្ឋមន្រ្តី ហ៊ុន ម៉ានី អញ្ជើញផ្តល់បាឋកថាស្តីពី «កំណែទម្រង់រដ្ឋបាលសាធារណៈ» ជូនដល់សមាជិក សមាជិកាយុវជនគណបក្សប្រជាជនកម្ពុជា (ភ្នំពេញ)៖ ឯកឧត្តម ហ៊ុន ម៉ានី សមាជិកគណៈអចិន្ត្រៃយ៍នៃគណៈកម្មាធិការកណ្តាល គណបក្សប្រជាជនកម្ពុជា និងជាឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ បានអញ្ជើញផ្តល់បាឋកថាស្តីពី «កំណែទម្រង់រដ្ឋបាលសាធារណៈ» នាព្រឹកថ្ងៃអាទិត្យទី១៣ ខែកក្កដា ឆ្នាំ២០២៥ ។ ការអញ្ជើញផ្តល់បាឋកថានេះ គឺធ្វើឡើងក្នុងវេទិកាផ្សព្វផ្សាយរបស់យុវជន គណបក្សប្រជាជនកម្ពុជាថ្នាក់កណ្តាល ដែលមានសមាជិក សមាជិកា យុវជនគណបក្សចូលរួមសរុបចំនួន ៣,៥០០នាក់ នៅទីស្នាក់ការកណ្តាល គណបក្សប្រជាជនកម្ពុជា(វិមាន ៧មករា) ។ ក្នុងបទបាឋកថា ឯកឧត្តមឧបនាយករដ្ឋមន្រ្តី បានរំលឹកអំពីទិដ្ឋភាពទូទៅ នៃការកែទម្រង់រដ្ឋបាលសាធារណៈទាំងនៅលើសកលលោក ទាំងនៅក្នុងបរិបទនៃកម្ពុជា។ ក្នុងនោះ ឯកឧត្តម ក៏បានរំលេចពីការអនុវត្តវិធានការគន្លឹះទាំង៣ ក្នុងការកែទម្រង់រដ្ឋបាលសាធារណៈ ដែលជាកិច្ចការងារអាទិភាពរបស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំដោយផ្ទាល់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា តាមរយៈគណៈកម្មាធិការជាតិ ជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាលនីតិកាលទី៧ នៃរដ្ឋសភា (គ.វ.រ.)។ សូមជម្រាបផងដែរថា…

ក្រុងបាវិតទទួលបានផ្លូវបេតុងមួយខ្សែទៀត ស្វាយរៀង៖រដ្ឋបាលក្រុងបាវិតកាលពីថ្ងៃទី១៣ ខែកក្កដា ឆ្នាំ២០២៥ បានធ្វើការជួសជុលលើកកម្រិតផ្លូវមួយ​ខ្សែ​ប្រវែង ៩៥០ម៉ែត្រ ទទឹង ៨ម៉ែត្រ ពីផ្លូវ​ប្រភេទ​ថ្មមិចទៅជាប្រភេទផ្លូវបេតុង ។ផ្លូវនេះស្ថិតនៅភូមិបាវិតកណ្តាល សង្កាត់បាវិត ក្រុងបាវិត ដោយមាន​ការ​ចូលរួមគាំទ្រពីក្រុមហ៊ុនដីញូវីនេទៀន (THE NEW VENETIAN RESORT CO.LTD) និងសប្បុរស​ជននានាក្នុងក្រុងបាវិត ។ លោក លឹម សៀងហេង អភិបាលក្រុងបាវិតបានអរគុណដល់ប្រជាពលរដ្ឋទាំងអស់ ដែលរស់នៅ​តាម​បណ្តោយ​ផ្លូវនេះ ដោយ​បានចូលរួមសហការប្រកបដោយស្មារតី​ទទួលខុសត្រូវ ដែលធ្វើឱ្យការងារ​ស្ថាបនាផ្លូវបានប្រព្រឹត្តទៅ​ដោយរលូន។ លោកអភិបាលក្រុងបានបន្តថា ក្រោមការយកចិត្តទុកដាក់ពីប្រមុខរាជរដ្ឋាភិបាល​និងឯកឧត្តម ប៉េង ពោធិ៍សា អភិបាលខេត្តបានជំរុញការងារ​កសាងហេដ្ឋា​រចនា​សម្ព័ន្ធនៅ​តាមបណ្តាស្រុក ក្រុង នានាក្នុងខេត្តស្វាយរៀង ជាពិសេសក្រុងបាវិត​ដោយមានទាំងគម្រោងស្ថាបនារបស់រាជរដ្ឋាភិបាល និងសប្បុរសជនចូលរួមផង ដើម្បី​អភិវឌ្ឍន៍ក្រុងបាវិតឱ្យកាន់តែរីកចម្រើននិងផ្លាស់ប្តូរមុខមាត់ថ្មី៕

សម្តេចតេជោ​ ហ៊ុន​ សែន​ បានសរសេរនៅលើបណ្តាញសង្គមនារសៀលថ្ងៃទី១៣ ខែកក្កដា ឆ្នាំ២០២៥នេះ ថា​ ដូចការលើកឡើងរបស់ខ្ញុំកាលពីថ្ងៃទី២៧ ខែមិថុនា ឆ្នាំ២០២៥ នៅខេត្តព្រះវិហារអ៊ីចឹងមែន មេឧក្រិដ្ឋជនឆបោកអនឡាញនៅពាសពេញប្រទេសថៃ ហើយទីក្រុងបាងកក ជាសំបុកនៃពួកឧក្រិដ្ឋជនឆបោកខុសច្បាប់ និងលាងលុយកខ្វក់ទាំងនោះ ហើយក្រុមនេះរីករាលហៀរចេញពីថៃចូលកម្ពុជា នៅពេលនេះលោក ថាក់ស៊ីន បានសារភាពតាមកិច្ចសម្ភាសន៍លើទូរទស្សន៍ថៃ កាលពីថ្ងៃទី៩ ខែកក្កដា ឆ្នាំ២០២៥ ដោយបាននិយាយថា ឧក្រិដ្ឋជនធំៗឆបោកតាមអនឡាញកំពុងស្នាក់នៅអាផាតមិនថ្លៃៗរាប់ពាន់លានបាត នៅទីក្រុងបាងកក ហើយធ្វើដំណើរដោយសេរី ចេញចូលប្រទេសក្បែរខាង។ សម្តេចតេជោបន្តថា​ ជាក់ស្ដែងកាលពីថ្ងៃទី៩ ខែកក្កដា ២០២៥ ប៉ូលិសអន្តោប្រវេសន៍ថៃ បានចាប់ខ្លួនមេធំល្បែងអនឡាញ និងលាងលុយដែលមានតម្លៃ ១១.៥២ពាន់លានបាត នៅឯព្រលានយន្តហោះអន្តរជាតិ ដនមឿង ស្របពេលរបាយការណ៍របស់ ការិយាល័យប្រឆាំងគ្រឿងញៀន និងឧក្រិដ្ឋកម្មរបស់ អង្គការសហប្រជាជាតិ ​ហៅកាត់ថា UNODC បានបញ្ចេញថា ការផលិត និងជួញដូរគ្រឿងញៀន នៅក្នុងតំបន់ត្រីកោណជាប់ព្រំដែន រវាងប្រទេសមីយ៉ាន់ម៉ា ឡាវ និងថៃ បានកើនឡើងគួរឱ្យកត់សម្គាល់ ខណៈប្រទេសថៃគឺជាច្រកផ្លូវឆ្លងកាត់ និងជាទីកន្លែងមួយដ៏សំខាន់ សម្រាប់ចែកចាយគ្រឿងញៀនមួយផ្នែកធំលើសលុបចេញ ពីតំបន់ត្រីកោណមាស។…

ព្យុងយ៉ាង ៖ ប្រមុខការទូតរុស្ស៊ី នៅថ្ងៃទី១២ ខែកក្កដា បានព្រមានប្រឆាំងអាមេរិក កូរ៉េខាងត្បូង និងជប៉ុន ដែលប៉ន់ប៉ងបង្កើតភាពជាដៃគូសន្តិសុខសំដៅប្រឆាំងនឹងកូរ៉េខាងជើង។ ការព្រមាននេះកើតឡើងស្របពេលដែលសម្ព័ន្ធមិត្តមានអាវុធនុយក្លេអ៊ែរក្នុងដៃទាំងពីរនេះ ពិភាក្សាពីការពង្រឹងថែមទៀតលើវិស័យយោធា និងកិច្ចសហប្រតិបត្តិការផ្សេងទៀត ខណៈភាគីរុស្ស៊ីកំពុងជាប់ដៃប្រយុទ្ធក្នុងសង្គ្រាមនៅអ៊ុយក្រែន។ ថ្លែងប្រាប់អ្នកសារព័ត៌មាន បន្ទាប់ពីជួបជាមួយប្រមុខការទូតកូរ៉េខាងជើង រដ្ឋមន្ត្រីការបរទេសរុស្ស៊ី លោក Sergey Lavrov បានចោទប្រកាន់អាមេរិក កូរ៉េខាងត្បូង និងជប៉ុនថា កំពុងពួនសំងំបង្កើតយោធាប្រឆាំងនឹងកូរ៉េខាងជើង។ លោកថា យើងព្រមានប្រឆាំងនឹងការកេងប្រវ័ញ្ចទំនាក់ទំនងនេះ ដើម្បីបង្កើតសម្ព័ន្ធមិត្តដែលសំដៅប្រឆាំងនឹងនរណាម្នាក់ រួមទាំងប្រទេសកូរ៉េខាងជើង និងរុស្ស៊ី។ នៅថ្ងៃទី១២ ខែកក្កដា ប្រទេសទាំងបីបានធ្វើសមយុទ្ធដែនអាកាសរួមគ្នា ដែលពាក់ព័ន្ធនឹងយន្តហោះទម្លាក់គ្រាប់បែក មានសមត្ថភាពវាយប្រហារនុយក្លេអ៊ែររបស់អាមេរិកនៅជិតឧបទ្វីបកូរ៉េ ខណៈមន្ត្រីយោធាកំពូលរបស់ពួកគេបានជួបប្រជុំគ្នានៅទីក្រុងសេអ៊ូល និងបានជំរុញឱ្យកូរ៉េខាងជើងបញ្ឈប់រាល់សកម្មភាពខុសច្បាប់ដែលគំរាមកំហែងដល់សន្តិសុខក្នុងតំបន់។ សម្រាប់កូរ៉េខាងជើងតែងតែចាត់ទុកសមយុទ្ធយោធាធំៗ ដែលដឹកនាំដោយ អាមេរិកថា ជាការហាត់សមការឈ្លានពាន។ លើសពីនេះ របបលោក គីម ជុងអ៊ុន បានអះអាងជាយូរមកហើយ ថា ខ្ខ្លួនត្រូវបានគេបង្ខំឱ្យបង្កើតអាវុធនុយក្លេអ៊ែរ ដដើម្បីទុកការពារខ្លួនពីការគំរាមកំហែងផ្នែកយោធារបស់អាមេរិក៕ ប្រភព ៖ AP

តិចសាស់ ៖ ក្រសួងយុត្តិធម៌និយាយថា បុរសនៅរដ្ឋតិចសាស់ម្នាក់ត្រូវចាប់ខ្លួន កាលពីថ្ងៃព្រហស្បតិ៍ ពីបទគំរាមសម្លាប់លោកប្រធានាធិបតី Donald Trump។ ការគំរាមនេះកើតឡើងមួយថ្ងៃមុនពេលលោកប្រធានាធិបតី Trump ទៅកាន់រដ្ឋតិចសាស់ នៅក្នុងថ្ងៃសុក្រ ជាផ្នែកមួយនៃដំណើរទស្សនកិច្ចរបស់លោកទៅកាន់រដ្ឋ ដែលរងការបំផ្លិចបំផ្លាញដោយទឹកជំនន់ដ៏អាក្រក់បំផុតនាពេលថ្មីៗនេះ។ ជនសង្ស័យរូបនេះ មានឈ្មោះ Robert Herrera វ័យ ៥២ឆ្នាំ ត្រូវបានចាប់ខ្លួនបន្ទាប់ពីរូបគេបានខំមិនសារគំរាមនៅលើទំព័រ Facebook របស់សារព័ត៌មានក្នុងស្រុកមួយ ដែលបង្ហោះអំពីដំណើរទស្សនកិច្ចរបស់លោក Trump ទៅកាន់រដ្ឋតិចសាស់ ដែលរងគ្រោះទឹកជំនន់។ ក្នុងអត្ថន័យខំមិននោះ ជនសង្ស័យបានប្រើប្រាស់ខ្លឹមសារគំរាមធ្វើឃាតលោក Trump ដោយបង្ហោះសារភ្ជាប់ជាមួយរូបភាពលោក Trump ត្រូវបានគេបាញ់ចំត្រចៀកកាលពីឆ្នាំ២០២៤ នៅទីក្រុងButler រដ្ឋPennsylvania។ សូមរម្លឹកថា លោកប្រធានាធិបតី Trump បានរួចផុតជីវិតពីការប៉ុនប៉ងធ្វើឃាតម្តងរួចមកហើយ នៅឯការប្រមូលផ្តុំមួយនៅទីក្រុង Butler កាលពីខែកក្កដាឆ្នាំមុន ក្នុងអំឡុងពេលយុទ្ធនាការបោះឆ្នោតរបស់គាត់។ ខ្មាន់កាំភ្លើងបានបាញ់លោកប្រធានាធិបតីចំត្រចៀក សម្លាប់អ្នកគាំទ្រម្នាក់ និងពីរនាក់ទៀតរងរបួស មុនពេលត្រូវបានបាញ់សម្លាប់ដោយសេវាកម្មសម្ងាត់របស់អាមេរិក៕ ប្រភព ៖ RT

ណៃពិដោ ៖ ក្នុងរយៈពេល ១៨ខែចុងក្រោយនេះ ប្រទេសបង់ក្លាដែសបានចុះបញ្ជីលំហូរជនភៀសខ្លួនរ៉ូហ៊ីងយ៉ាដ៏ធំបំផុត ចាប់តាំងពីការភៀសខ្លួនដ៏ច្រើននៃជនជាតិដើមភាគតិចមូស្លីមរបស់ប្រទេសមីយ៉ាន់ម៉ាជិតមួយទសវត្សរ៍មុនមក។ ទីភ្នាក់ងារជនភៀសខ្លួនរបស់អង្គការសហប្រជាជាតិ (UNHCR) និយាយថា ជនជាតិរ៉ូហ៊ីងយ៉ារហូតដល់ ១៥០.០០០នាក់បានមកដល់ជំរុំជនភៀសខ្លួន Cox’s Bazar របស់ប្រទេសបង់ក្លាដែស ចាប់តាំងពីដើមឆ្នាំ២០២៤។ អ្នកនាំពាក្យទីភ្នាក់ងារ UNHCR លោក Babar Baloch បានប្រាប់អ្នកយកព័ត៌មាននៅទីក្រុងហ្សឺណែវថា អំពើហិង្សា និងការធ្វើទុក្ខបុកម្នេញនៅក្នុងរដ្ឋរ៉ាឃីន និងជម្លោះដែលកំពុងបន្តនៅក្នុងប្រទេសមីយ៉ាន់ម៉ា គឺជាមូលហេតុបង្ខំឱ្យជនជាតិរ៉ូហ៊ីងយ៉ារាប់ពាន់នាក់ស្វែងរកជម្រកសុវត្ថិភាព និងការការពារនៅក្នុងប្រទេសបង់ក្លាដែស។ លោកថា កំណើនជនភៀសខ្លួនរ៉ូហ៊ីងយ៉ាហូរចូលទៅក្នុងប្រទេសបង់ក្លាដែស ក្នុងរយៈពេលជាច្រើនខែមកនេះ គឺជាចំនួនដ៏ច្រើនបំផុតមកពីប្រទេសមីយ៉ាន់ម៉ា ចាប់តាំងពីឆ្នាំ២០១៧ នៅពេលដែលមនុស្សប្រហែល ៧៥០.០០០នាក់បានបង្ខំចិត្តភៀសខ្លួនចេញពីអំពើហិង្សាដ៏សាហាវនៅក្នុងរដ្ឋរ៉ាឃីន ជាទឹកដីដើមកំណើតរបស់ពួកគេ។ លោក Baloch បន្ថែមថា ជំរុំសង្គ្រោះដែលមានទំហំត្រឹមតែ ២៤គីឡូម៉ែត្រការ៉េក្នុងប្រទេសបង់ក្លាដែស បានក្លាយជាកន្លែងមួយ ក្នុងចំណោមកន្លែងដែលមានប្រជាជនច្រើនបំផុតនៅលើពិភពលោក។ ជាមួយគ្នានេះ លោក Baloch បានកោតសរសើរចំពោះសមានចិត្តបង់ក្លាដែស ដែលបានផ្តល់ជាម្ចាស់ផ្ទះទទួលយកជនភៀសខ្លួនរ៉ូហ៊ីងយ៉ាយ៉ាងសប្បុរសជាច្រើនជំនាន់៕ ប្រភព ៖ AFP