Category: ព័ត៌មានជាតិ​

ប្រមុខការទូតអាមេរិក លោក Antony Blinken គ្រោងទៅដល់អ៊ីស្រាអែលនៅថ្ងៃអាទិត្យនេះ ជាផ្នែកមួយនៃការជំរុញកាន់តែខ្លាំងផ្នែកការទូតរបស់ក្រុង Washington ដើម្បីសម្រេចបានបទឈប់បាញ់ក្នុងដែនដីហ្កាហ្សា ដែលនឹងបញ្ចប់សង្រ្គាមរយៈពេល១០ខែ រវាងអ៊ីស្រាអែល និងក្រុមហាម៉ាស។ ដំណើរលើកទី១០របស់ប្រមុខការទូតអាមេរិក ទៅកាន់តំបន់នេះចាប់តាំងពីសង្រ្គាមបានផ្ទុះឡើងកាលពីថ្ងៃទី៧ខែតុលា២០២៣ កើតឡើងប៉ុន្មានថ្ងៃ ក្រោយអាមេរិក ព្យាយាមជំរុញ ហើយក្រុមអ្នកសម្របសម្រួលកាតា និងអេហ្ស៊ីប ជឿជាក់ថានៅសល់ចន្លោះប្រហោងតិចតួចរវាងភាគីជម្លោះ។ មន្ត្រីសហរដ្ឋអាមេរិកបានលើកឡើងពីសុទិដ្ឋិនិយមថ្មី ដើម្បីនាំយកកិច្ចព្រមព្រៀងនេះ ឈានទៅដល់ទីបញ្ចប់ ប៉ុន្តែក៏ព្រមានផងដែរថា នៅតែមានការងារជាច្រើនទៀតត្រូវធ្វើ។ មន្ត្រីរដ្ឋបាលជាន់ខ្ពស់លោក Biden បានប្រាប់អ្នកសារព័ត៌មានកាលពីថ្ងៃសុក្រថា អ្វីដែលយើងបានធ្វើគឺបង្រួមចន្លោះប្រហោងដែលនៅសេសសល់ តាមរបៀបដែលយើងគិតថាជាមូលដ្ឋាន បច្ចុប្បន្ននេះពួកគេ ត្រៀមខ្លួនរួចជាស្រេចដើម្បីបិទ និងអនុវត្ត កិច្ចព្រមព្រៀង និងឆ្ពោះទៅមុខ ។ នៅអ៊ីស្រាអែល គេរំពឹងថាលោក Blinken នឹងជួបជាមួយនាយករដ្ឋមន្ត្រីអ៊ីស្រាអែល និងមន្ត្រីជាន់ខ្ពស់ផ្សេងទៀត៕

យោងតាមទីភ្នាក់ងារសារព័ត៌មានសាធារណៈរដ្ឋអ៊ីស្លាម (IRNA)រដ្ឋមន្ត្រីការបរទេស ស្តីទីរបស់អ៊ីរ៉ង់ លោក Ali Bagheri Kani បានប្រាប់សមភាគីអេហ្ស៊ីប ថា អ៊ីរ៉ង់រក្សាសិទ្ធិក្នុងការអនុវត្ត ការឆ្លើយតបស្របច្បាប់ ប្រឆាំងអ៊ីស្រាអែលចំពោះការធ្វើឃាតមេដឹកនាំក្រុមហាម៉ាស លោក Ismail Haniyeh នៅទីក្រុងតេអេរ៉ង់ ។ អ៊ីស្រាអែលពុំបានទទួលខុសត្រូវលើការសម្លាប់នេះទេ ប៉ុន្តែត្រូវបានគេចង្អុលមុខរួចទៅហើយ។ តំបន់នេះបានស្ថិតក្នុងការប្រុងប្រយ័ត្នខ្ពស់អស់រយៈពេលជាងពីរសប្តាហ៍សម្រាប់ការវាយប្រហារដោយផ្ទាល់របស់អ៊ីរ៉ង់ប្រឆាំងនឹងអ៊ីស្រាអែល សងសឹកចំពោះការធ្វើឃាត លោក Haniyeh ។ សហរដ្ឋអាមេរិកបានសង្ឃឹមថា ការបញ្ចប់កិច្ចព្រមព្រៀងចំណាប់ខ្មាំងហ្កាហ្សា និងបទឈប់បាញ់នឹងបញ្ចៀសការវាយប្រហារណាមួយ ដែលខ្លួនបារម្ភថានឹងបង្កឱ្យមានសង្គ្រាមរីកធំក្នុងតំបន់ ដោយគ្រាន់តែខ្លួនសង្ឃឹមថានឹងស្តារភាពស្ងប់ស្ងាត់ដល់មជ្ឈិមបូព៌ា៕

ព្រះមហាក្សត្រថៃ Maha Vajiralongkorn បានរាជានុម័តតែងតាំងលោកស្រី Paetongtarn Shinawatra ជានាយករដ្ឋមន្ត្រីនៅថ្ងៃអាទិត្យ ១៨ សីហានេះ ពីរថ្ងៃបន្ទាប់ពីសភាបានជ្រើសរើសលោកស្រី ដោយត្រួសត្រាយផ្លូវសម្រាប់លោកស្រីដើម្បីបង្កើតគណៈរដ្ឋមន្ត្រីក្នុងប៉ុន្មានសប្តាហ៍ខាងមុខ។ ការរាជាអនុម័តរបស់ព្រះមហាក្សត្រ ដែលជាទម្រង់បែបបទមួយ ត្រូវបានអានដោយលេខាធិការសភាតំណាងរាស្រ្ត លោក Apat Sukhanan ក្នុងពិធីមួយនៅទីក្រុងបាងកក។ ដោយស្លៀកពាក់ឯកសណ្ឋានផ្លូវការ និងអមដំណើរដោយឪរបស់លោកស្រីគឺលោក Thaksin លោកស្រី Paetongtarn បានលុតជង្គង់គោរព្រះឆាយាល័ក្ខណ៍ របស់ព្រះបាទ Vajiralongkorn មុនពេលថ្លែងសុន្ទរកថាខ្លីមួយដោយថ្លែងអំណរគុណដល់ព្រះមហាក្សត្រ និងតំណាងប្រជាជនដែលបានគាំទ្រលោកស្រីជានាយករដ្ឋមន្ត្រី។ លោកស្រីបានថ្លែងថា ក្នុងនាមជាមេដឹកនាំ ខ្ញុំនឹងបំពេញតួនាទីរបស់ខ្ញុំរួមជាមួយសមាជិកសភាដោយស្មោះអស់ពីបេះដូង។ លោកស្រីបានបន្ថែមថា ខ្ញុំនឹងស្តាប់រាល់មតិទាំងអស់ ដើម្បីយើងអាចដឹកនាំប្រទេសទៅមុខប្រកបដោយស្ថិរភាព៕

ភ្នំពេញ៖ នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ បានបញ្ជាក់ថា នៅព្រឹក​ថ្ងៃទី១៨ ខែសីហា ឆ្នាំ២០២៤នេះ ស្ថានភាពទូទៅនៅទូទាំងប្រទេសកម្ពុជា រួមទាំងរាជធានី​ភ្នំពេញ មិនមានសកម្មភាពប្រមូលផ្តុំ ឬចលនាណាមួយប្រឆាំងរាជរដ្ឋាភិបាលកម្ពុជា​បានកើត​ឡើង ដូចការបំផុសបំផុលរបស់ក្រុមប្រឆាំងជ្រុលនិយមនោះឡើយ។ ប្រជាពលរដ្ឋនៅតែ​ប្រក​បរបរ និងការងារជាធម្មតាក្នុងជីវភាពប្រចាំថ្ងៃ ខណៈដែលនៅតាមដងផ្លូវ និងទីសាធារណៈនានា មានសភាពស្ងប់ស្ងាត់ មិនមានបាតុភាពអ្វីគួរឱ្យកត់សម្គាល់នោះទេ។ នាយឧត្តមសេនីយ៍ ឈុំ សុជាតិ បន្តថា លទ្ធផលនៅថ្ងៃនេះ បានបង្ហាញឱ្យឃើញអំពីភាពបរាជ័យដ៏អាម៉ាស់ជាថ្មីរបស់ក្រុមប្រឆាំងជ្រុលនិយមនៅក្រៅប្រទេស ដែលតែងមានគំនិតទុច្ចរិតប៉ុនប៉ងផ្តួលរំលំរាជរដ្ឋាភិបាលកម្ពុជា ក្រៅគន្លងប្រជាធិបតេយ្យ ដែលនេះគ្រាន់តែជាក្តីស្រមៃបែបរវើរវាយប៉ុណ្ណោះ ហើយក៏បញ្ជាក់ឱ្យឃើញដែរថា ប្រជាពលរដ្ឋ និងយុវជនខ្មែរមានការយល់ដឹង ពុំបានឆោតល្ងង់ចូលរួម ឬសម្តែងការគាំទ្រទាល់តែសោះ ជាមួយនឹងសកម្មភាពរបស់ពួកគេ។ នាយឧត្តមសេនីយ៍ ឈុំ សុជាតិ បញ្ជាក់ថា ទោះបីជាមិនមានបាតុភាពណាមួយបានកើតឡើង ដូចអ្វីដែលក្រុមឧទ្ទាមបានខិតខំញុះញង់ បំផុសបំផុលក៏ដោយ ក៏កម្លាំងចម្រុះ នៃកងយោធពលខេមរភូមិន្ទ បានត្រៀមខ្លួនជានិច្ច ក្នុងការបង្ការ ទប់ស្កាត់ និងបង្ក្រាបរាល់សកម្មភាពវិទ្ធង្សនាទាំងឡាយ ដែលមានចេតនាពិសពុល ក្នុងការបង្កឱ្យមានចលាចល រំខានដល់ភាពសុខសាន្តរបស់ប្រជាពលរដ្ឋ ធ្វើឱ្យប៉ះពាល់ដល់សន្តិភាព ស្ថិរភាព និងការអភិវឌ្ឍនៃព្រះរាជាណាចក្រកម្ពុជា។ នាយឧត្តមសេនីយ៍…

អាហ្វហ្គានីស្ថាន បានរៀបចំព្រឹត្តិការណ៍ជាបន្តបន្ទាប់ទូទាំងប្រទេស ដើម្បីប្រារព្ធខួបលើកទីបីនៃការដកកងកម្លាំងដឹកនាំដោយសហរដ្ឋអាមេរិកចេញពីប្រទេសដែលហែកហួរដោយសង្រ្គាម។ នៅថ្ងៃទី ១៥ ខែសីហា ឆ្នាំ ២០២១ កងកម្លាំងតាលីបង់បានចូលដណ្តើមកាន់កាប់រដ្ឋធានីកាប៊ុល ដោយជំរុញឱ្យមានការដកទ័ពអាមេរិក ដែលឈរជើងនៅអាហ្វហ្គានីស្ថានយ៉ាងប្រញាប់ប្រញាល់។ នៅក្នុងរដ្ឋធានីកាប៊ុល មនុស្សជាច្រើនបានចេញទៅតាមដងផ្លូវដើម្បីអបអរសាទរការវិលត្រឡប់នៃសន្តិភាពដល់អាហ្វហ្គានីស្ថាន ខណៈដែលក្រុមតាលីបង់ធ្វើព្យុហយាត្រាដ៏ធំរម្លឹកជ័យជម្នះ។ និស្សិតសាកលវិទ្យាល័យកាប៊ុល បានថ្កោលទោសសហរដ្ឋអាមេរិកចំពោះការមិនគោរពសិទ្ធិមនុស្សនៅក្នុងប្រទេសដទៃទៀត។ គ្មានអ្វីគួរឱ្យសង្ស័យទេដែលមុខមាត់អាក្រក់របស់សហរដ្ឋអាមេរិក និងសម្ព័ន្ធមិត្ត ដែលបានស្រែកអំពីសិទ្ធិមនុស្សកាលពីអតីតកាល ឥឡូវនេះត្រូវបានលាតត្រដាងយ៉ាងពេញលេញ។ តើមានអ្វីកើតឡើងនៅហ្កាហ្សា។ នេះជាឧទាហរណ៍មួយដែលបានលាតត្រដាងពីមុខមាត់អាក្រក់របស់អ្នកដែលហៅខ្លួនឯងថាជាអ្នកការពារសិទ្ធិកុមារ និងសិទ្ធិស្ត្រី។ ដោយកត់សម្គាល់ថាវត្តមានរបស់យោធាអាមេរិករយៈពេល ២០ ឆ្នាំនៅក្នុងប្រទេសអាហ្វហ្គានីស្ថានបានធ្វើឱ្យប្រទេសនេះជួបតែការបំផ្លិចបំផ្លាញ និស្សិតរូបនោះបានសង្កត់ធ្ងន់ថាសហរដ្ឋអាមេរិកបានបន្តរំលោភបំពានលើប្រទេសអាហ្វហ្គានីស្ថានដោយលើកឡើងពីការបង្កកទ្រព្យសម្បត្តិធនាគារកណ្តាលអាហ្វហ្គានីស្ថានដោយខុសច្បាប់នៅក្នុងសហរដ្ឋអាមេរិកដែលជាឧបសគ្គចម្បងចំពោះមុខក្រោយចប់សង្រ្គាមដើម្បីកសាងប្រទេសអាហ្វហ្គានីស្ថានឡើងវិញ ៕

ប្រទេសជប៉ុន កាលពីថ្ងៃព្រហស្បតិ៍ (១៥ សីហា) បានដកការព្រមាន ដែលថាអាចនឹងមាន «ការរញ្ជួយដីទ្រង់ទ្រាយធំ» បង្កការខូចខាតយ៉ាងច្រើនសន្ធឹកសន្ធាប់ និងការបាត់បង់អាយុជីវិត ដោយរដ្ឋាភិបាលប្រាប់ប្រជាជនឱ្យ «វិលទៅរកភាពធម្មតាវិញ»។ ការដាស់តឿនរយៈពេលមួយសប្តាហ៍ ដែលថាមហន្តរាយបែបនេះអាចវាយប្រហារលើប្រជុំកោះដែលមានមនុស្សចំនួន ១២៥លាននាក់ បានជំរុញឱ្យមនុស្សរាប់ពាន់នាក់លុបចោលដំណើរកម្សាន្តរបស់ពួកគេ និងសម្រុកស្តុកទុកទំនិញសំខាន់ៗសម្រាប់ទុកប្រើប្រាស់។ រដ្ឋមន្ត្រីគ្រប់គ្រងគ្រោះមហន្តរាយ លោក យូស៊ីហ្វ៊ូមិ ម៉ាត់ស៊ូមូរ៉ា (Yoshifumi Matsumura) បាននិយាយថា «ប្រជាជនជប៉ុន អាចវិលត្រលប់ទៅប្រើជីវិតរស់នៅតាមធម្មតាវិញ» ខណៈលោកបានប្រកាសដកការព្រមានកាលពីម៉ោង ៥ល្ងាច (ម៉ោងក្នុងស្រុក) ថ្ងៃព្រហស្បតិ៍។ ទោះជាយ៉ាងណាក៏ដោយ លោកបន្ថែមថា ប្រជាពលរដ្ឋមិនគួរភ្លេចវិធានការការពារដូចជា ទុកដាក់គ្រឿងសង្ហារឹមឱ្យមានសុវត្ថិភាព ត្រូវប្រាកដថាសមាជិកគ្រួសារដឹងពីទីតាំងជំរកជម្លៀស និងការស្តុកទុកស្បៀងអាហារសង្គ្រោះបន្ទាន់។ ក្រុមអ្នកជំនាញរបស់ទីភ្នាក់ងារឧតុនិយមជប៉ុន (JMA) កាលពីថ្ងៃទី០៨ ខែសីហា បានចេញសេចក្តីណែនាំថា មាន «ឱកាសខ្ពស់ខ្លាំង» នៃការរញ្ជួយដីនៅតំបន់ ណានកៃ តូរ៉ាហ្វុ (Nankai Trough) ដែលអាចមានកម្លាំងដល់ទៅ ៩រ៉ិចទ័រ បន្ទាប់ពីគ្រោះរញ្ជួយដីកម្រិត ៧,១រ៉ិចទ័រ បានវាយប្រហារភាគនិរតីរបស់ជប៉ុន។ នោះគឺជាប្រភេទនៃការរញ្ជួយជាក់លាក់មួយ ដែលគេស្គាល់ថាជារញ្ជួយដីទ្រង់ទ្រាយធំ ដែលបានកើតឡើងជាគូកាលពីអតីតកាល…