Author: Dol Pheakdey
-
ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ នៃព្រះរាជាណាចក្រកម្ពុជា បានទទួលជួបសម្តែងការគួរសម និងពិភាក្សាការងារជាមួយឯកឧត្តមបណ្ឌិត កៅ គឹមហួន អគ្គលេខាធិការអាស៊ាន ក្នុងឱកាសនៃកិច្ចប្រជុំសហប្រតិបត្តិការអាស៊ាន និងអាស៊ានបូកបី ស្តីពីកិច្ចការមុខងារសាធារណៈ នៅប្រទេសប្រ៊ុយណេដារូស្សាឡាម
នារសៀលថ្ងៃទី០៦ ខែសីហា ឆ្នាំ២០២៤ ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ នៃព្រះរាជាណាចក្រកម្ពុជា បានទទួលជួបសម្តែងការគួរសម និងពិភាក្សាការងារជាមួយឯកឧត្តមបណ្ឌិត កៅ គឹមហួន អគ្គលេខាធិការអាស៊ាន ក្នុងឱកាសនៃកិច្ចប្រជុំសហប្រតិបត្តិការអាស៊ាន និងអាស៊ានបូកបី ស្តីពីកិច្ចការមុខងារសាធារណៈ នៅប្រទេសប្រ៊ុយណេដារូស្សាឡាម។ ក្នុងជំនួបនេះ ឯកឧត្តមអគ្គលេខាធិការអាស៊ាន បានចូលរួមសូមអបអរសាទរ កម្ពុជាសម្រាប់ភាពជាប្រធានប្តូរវេនរបស់អាស៊ាន លើក្របខណ្ឌកិច្ចប្រជុំសហប្រតិបត្តិការអាស៊ាន លើកទី២៣ និងអាស៊ានបូកបី លើកទី៨ ស្តីពីកិច្ចការមុខងារសាធារណៈ ដែលនឹងគ្រោងរៀបចំនៅកម្ពុជា។ ឯកឧត្តមបណ្ឌិត កៅ គឹមហួន បានបញ្ជាក់នូវការគាំទ្រយ៉ាងពេញទំហឹងរបស់អគ្គលេខាធិការដ្ឋានអាស៊ាន ចំពោះកម្ពុជា ក្នុងការធ្វើជាប្រធាន ACCSM នៅឆ្នាំ ២០២៤-២០២៦។
-
មន្ត្រីជលផលខេត្តកំពង់ចាមបន្តចុះបង្ក្រាបបទល្មើសនេសាទ ក្នុងភូមិសាស្ត្រស្រុកកងមាស
កំពង់ចាម៖ មន្ត្រីជំនាញនៃខណ្ឌរដ្ឋបាលជលផលកំពង់ចាម សហការជាមួយកម្លាំងសមត្ថកិច្ចមូលដ្ឋានស្រុកកងមាស បន្តចុះប្រតិបត្តិការត្រួតពិនិត្យ និងបង្រ្កាបបទល្មើសជលផលខុសច្បាប់ នៅតាមបឹង ក្នុងភូមិសាស្ត្រស្រុកកងមាសខេត្តកំពង់ចាម។ ដោយមានសម្របសម្រួលពីឯកឧត្តម វង្ស ប៊ុនវិសុទ្ធ ព្រះរាជអាជ្ញានៃអយ្យការអមសាលាដំបូងខេត្តកំពង់ចាម លោក លី ស្រ៉ី នាយកខណ្ឌស្តីទីជលផលកំពង់ចាម បានដឹកនាំកម្លាំងសមត្ថកិច្ចចំរុះ បន្តចុះប្រតិបត្តិការត្រួតពិនិត្យ និងបង្រ្កាបបទល្មើសជលផលនៅថ្ងៃទី៦ ខែសីហា ឆ្នាំ២០២៤ ចុះបង្ក្រាបបាន២ករណី ដោយកសាងសំណុំរឿងតាមនិតិវិធីច្បាប់ស្តីពីជលផល និងរុះរើកាប់បំផ្លាញចោលវត្ថុតាងនៃបទល្មើសជលផលនៅនឹងកន្លែងកើតហេតុ។ លោកនាយខណ្ឌ បញ្ជាក់ថា ក្នុងប្រតិបត្តិការបង្ក្រាបនេះដែរ ជាលទ្ធផល កម្លាំងសមត្ថកិច្ចជំនាញបានដកហូតនិងបំផ្លាញ់ចោលវត្ថុតាងរួមមាន៖ ឧបករណ៍លូស្បៃមុងចំនួន៣៩មាត់, របាំងស្បៃមុងប្រវែង១៦៨៥ម៉ែត្រ, បង្គោលចម្រឹងចំនួន ៣៧០ដើមនិងបានចាក់លែងកូនត្រីចម្រុះទម្ងន់ ១៩៥គីឡូក្រាមផងដែរ៕
-
ស្ពានបាឡេឆ្លងកាត់រវាងឃុំអារក្សត្នោត ទៅឃុំទួលសំបួរ នៃស្រុកស្ទឹងត្រង់ ត្រូវបានទឹកជំនន់ទឹកភ្លៀងហូរច្រោះបាក់ស្រុត
កំពង់ចាម៖ អាជ្ញាធរខេត្តកំពង់ចាម បានចេញសេចក្តីជូនដំណឹងដល់បងប្អូនប្រជាពលរដ្ឋ ដែលធ្វេីដំណេីរឆ្លងកាត់ស្ពានបាឡេក្នុងឃុំទួលសំបួរនេះ គឺមិនអាចធ្វេីដំណេីរឆ្លងកាត់បានទេ ដោយត្រូវបញ្ចៀសការធ្វើចរាចរណ៍តាមផ្លូវផ្សេងជំនួសវិញ។ តាមបេីការបញ្ជាក់ពីអាជ្ញាធរមូលដ្ឋាន បានឲ្យដឹងថា ហេតុការណ៍បាក់ស្រុតស្ពានបាឡេនេះ កេីតឡេីងតាំងនៅរសៀលថ្ងៃទី៥ខែសីហា ឆ្នាំ២០២៤នេះ បង្កឡេីងដោយសារទឹកជំនន់ទឹកភ្លៀងហូរច្រោះបាក់ស្រុត។ ស្ពានបាឡេដែលតភ្ជាប់ពីឃុំអារក្សត្នោត ទៅឃុំទួលសំបួរ នៃស្រុកស្ទឹងត្រង់នេះ បច្ចុប្បន្ន អាជ្ញាធរស្រុក បានផ្អាកចរាចរណ៍ហេីយ មិនអាចធ្វើដំណើរឆ្លងកាត់បានឡើយ ដោយផ្សព្វផ្សាយ ឲ្យបងប្អូនប្រជាពលរដ្ឋ បញ្ចៀសការធ្វើចរាចរណ៍តាមផ្លូវផ្សេងវិញ៕
-
រដ្ឋមន្ត្រីព័ត៌មាន៖ ធម្មនុញ្ញវិជ្ជាជីវៈសារព័ត៌មានកម្ពុជា បង្កើតឡើងដើម្បីរក្សាសណ្តាប់ធ្នាប់ក្នុងវិស័យសារព័ត៌មាន លើកតម្លៃអ្នកសារព័ត៌មាន និងការពារសិទ្ធិអ្នកសារព័ត៌មាន
ភ្នំពេញ៖ ក្រសួងព័ត៌មាន បានប្រកាសដាក់ឱ្យអនុវត្ត «ធម្មនុញ្ញវិជ្ជាជីវៈសារព័ត៌មាន» ជាលេីកដំបូង នៅរសៀលថ្ងៃទី៦ ខែសីហា ឆ្នាំ២០២៤។ ក្នុងសន្និសីទសារព័ត៌មានមួយនៅរសៀលថ្ងៃដដែលនេះ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានលេីកឡេីងថា ធម្មនុញ្ញវិជ្ជាជីវៈសារព័ត៌មានកម្ពុជា បង្កើតឡេីងដើម្បីរក្សាសណ្តាប់ធ្នាប់ក្នុងវិស័យសារព័ត៌មាន លើកតម្លៃអ្នកសារព័ត៌មាន និងការពារសិទ្ធិអ្នកសារព័ត៌មាន។ ធម្មនុញ្ញវិជ្ជាជីវៈសារព័ត៌មាន កកើតឡើងដោយឈរលើធាតុចូលពីអ្នកសារព័ត៌មាន សមាគមសារព័ត៌មាន និងការផ្តល់មតិយោបល់ពីអង្គការជាតិ និងអង្គការអន្តរជាតិ ផងដែរ។ លោក នេត្រ ភក្ត្រា បានថ្លែងយ៉ាងដូច្នេះថា៖ «ធម្មនុញ្ញវិជ្ជាជីវៈសារព័ត៌មានកម្ពុជា” បង្កើតឡើងតាមការស្នើរបស់អ្នកសារព័ត៌មាន សមាគមអ្នកសារព័ត៌មាន និងបានឆ្លងកាត់ការប្រឹក្សាយោបល់ពីអង្គការជាតិ និងអន្តរជាតិ ផងដែរ។ អ្នកសារព័ត៌មាន សមាគមអ្នកសារព័ត៌មាន អង្គការជាតិ និងអន្តរជាតិ ជាធាតុចូលយ៉ាងសំខាន់ក្នុងការបង្កើត ធម្មនុញ្ញវិជ្ជាជីវៈសារព័ត៌មានកម្ពុជា»។ លោករដ្ឋមន្ត្រីក្រសួងព័ត៌មាន បានបញ្ជាក់ថា ធម្មនុញ្ញវិជ្ជាជីវៈសារព័ត៌មានកម្ពុជា បង្កើតឡើងក្នុ្ងងគោលបំណងរក្សាសណ្តាប់ធ្នាប់ក្នុងវិស័យសារព័ត៌មាន លើកតម្លៃអ្នកសារព័ត៌មាន និងការពារសិទ្ធិអ្នកសារព័ត៌មាន។ ធម្មនុញ្ញវិជ្ជាជីវៈសារព័ត៌មានកម្ពុជា មិនត្រឹមតែការពារ និងស្តារសណ្តាប់ធ្នាប់ក្នុងវិស័យសារព័ត៌មានប៉ុណ្ណោះទេ តែវាជាមូលដ្ឋានគ្រឹះដ៏សំខាន់មួយនៃក្របសីលធម៌វិជ្ជាជីវៈ ហេីយបង្កើតឡើងស្របពេលដែលវិស័យសារព័ត៌មាន និងសោតទស្សន៍មានការអភិវឌ្ឍយ៉ាងរហ័សជាមួយការកើនឡើងនូវបច្ចេកវិទ្យាព័ត៌មាន ពិសេស ការផ្លាស់ប្តូរនូវទម្រង់ប្រព័ន្ធផ្សព្វផ្សាយ ក្នុងនោះមានទាំងប្រព័ន្ធផ្សព្វផ្សាយបុរាណ…
-
ក្រុមហាម៉ាសតែងតាំងមេក្លោងការវាយប្រហារថ្ងៃទី៧តុលាលោកSinwarជាមេដឹកនាំបន្ទាប់ពីការធ្វើឃាតលោកHaniyeh
ក្រុមហាម៉ាសបាននិយាយកាលពីថ្ងៃទី ៦ ខែសីហា ថា ក្រុមនេះ បានតែងតាំងមេដឹកនាំដែនដីហ្កាហ្សារបស់ខ្លួន គឺលោក Yahya Sinwar ជាអ្នកស្នងតំណែងពីអតីតប្រធាននយោបាយលោកIsmail Haniyeh ដែលត្រូវបានធ្វើឃាតនៅទីក្រុង តេអេរ៉ង់កាលពីសប្តាហ៍មុន ក្នុងសកម្មភាពមួយដែលនឹងពង្រឹងកម្លាំងឡើងវិញចាប់តាំងពីការវាយប្រហារថ្ងៃទី ៧ ខែតុលា លើអ៊ីស្រាអែល។ លោក Sinwar ដែលជាស្ថាបត្យករនៃការវាយប្រហារដ៏សាហាវបំផុតលើអ៊ីស្រាអែលក្នុងរយៈពេលជាច្រើនទស្សវត្សរ៍មកនេះ បានលាក់ខ្លួននៅក្នុងដែនដីហ្កាហ្សា ដែលអ៊ីស្រាអែលតាមសម្លាប់ ចាប់តាំងពីការចាប់ផ្តើមនៃសង្រ្គាម។ ចលនានេះបាននិយាយនៅក្នុងសេចក្តីថ្លែងការណ៍ខ្លីមួយថា “ចលនាតស៊ូអ៊ីស្លាមហាម៉ាស ប្រកាសពីការជ្រើសរើសមេបញ្ជាការ Yahya Sinwar ជាប្រធានការិយាល័យនយោបាយនៃចលនានេះ បន្តពីមេបញ្ជាការទុក្ករបុគ្គល លោក Ismail Haniyeh ហើយសូមព្រះអាឡាប្រទានពរដល់រូបលោក” ។ ដំណឹងនៃការតែងតាំងនេះត្រូវបានស្វាគមន៍ដោយគ្រាប់រ៉ូកែតពីតំបន់ហ្កាហ្សាពីក្រុមសកម្មប្រយុទ្ធដែលនៅតែប្រយុទ្ធជាមួយទាហានអ៊ីស្រាអែលក្នុងតំបន់ត្រូវបានឡោមព័ទ្ធមួយនេះ។ លោក Sinwar ដែលបានចំណាយពេលពាក់កណ្តាលជីវិតពេញវ័យរបស់លោកនៅក្នុងពន្ធនាគារអ៊ីស្រាអែល គឺជាមេដឹកនាំក្រុមហាម៉ាសដ៏មានឥទ្ធិពលបំផុតដែលនៅរស់រានមានជីវិតបន្ទាប់ពីការធ្វើឃាត លោក Haniyeh ដែលបានធ្វើឲ្យតំបន់នេះស្ថិតនៅមាត់ជ្រោះនៃជម្លោះក្នុងតំបន់កាន់តែរីកធំ បន្ទាប់ពីអ៊ីរ៉ង់បានប្តេជ្ញាសងសឹកយ៉ាងចាស់ដៃ៕
-
ជប៉ុន ព្រមព្រៀងជួយអ៊ុយក្រែន ប្រយុទ្ធប្រឆាំងអំពើពុករលួយរបស់រដ្ឋាភិបាល
រដ្ឋមន្ត្រីក្រសួងយុត្តិធម៌ប្រទេសជប៉ុន លោក ខយហ្ស៊ូមិ រីយូជិ(Koizumi Ryuji) បានព្រមព្រៀងជួយប្រទេសអ៊ុយក្រែន ក្នុងការដោះស្រាយអំពើពុករលួយ។ វាជាបញ្ហាបន្ទាន់មួយដែលត្រូវដោះស្រាយដើម្បីឲ្យអ៊ុយក្រែនទទួលបានការគាំទ្របន្ថែមទៀតពីសហគមន៍អន្តរជាតិ។ លោក Koizumi កាលពីថ្ងៃចន្ទ បានជួបជាមួយរដ្ឋមន្ត្រីក្រសួងយុត្តិធម៌របស់ប្រទេសអ៊ុយក្រែន លោក Denys Maliuska និងអគ្គរដ្ឋអាជ្ញា លោក Andriy Kostin ក្នុងអំឡុងដំណើរទស្សនកិច្ចទៅកាន់ទីក្រុងគីវ រដ្ឋធានីប្រទេសអ៊ុយក្រែន។ ការរីករាលដាលនៃអំពើពុករលួយក្នុងចំណោមមន្ត្រីរដ្ឋាភិបាល គឺជាឧបសគ្គសម្រាប់អ៊ុយក្រែន ក្នុងការទទួលបានការគាំទ្រពីអន្តរជាតិកាន់តែខ្លាំងក្នុងការប្រយុទ្ធប្រឆាំងរុស្ស៊ី។ ក្នុងអំឡុងកិច្ចពិភាក្សា លោក Koizumi និងលោក Maliuska បានចុះហត្ថលេខាលើអនុស្សរណៈនៃការយោគយល់ សម្រាប់កិច្ចសហប្រតិបត្តិការក្នុងការបណ្តុះបណ្តាលបុគ្គលិកនៅទីភ្នាក់ងារស៊ើបអង្កេត ព្រមទាំងការបង្កើតច្បាប់ផងដែរ។ មន្ត្រីប្រទេសជប៉ុន និយាយថា ពួកគេមានបទពិសោធន៍ធ្លាប់ផ្តល់ជំនួយស្រដៀងគ្នានេះនៅអាស៊ី។ លោក Maliuska បានអរគុណដល់ប្រទេសជប៉ុន សម្រាប់ការផ្តល់ការគាំទ្រផ្នែកសេដ្ឋកិច្ច ផ្នែកការទូត និងផ្នែកច្បាប់ ដោយនិយាយថា ប្រទេសនេះគឺជាដៃគូដ៏សំខាន់សម្រាប់អ៊ុយក្រែន។ លោក Koizumi និយាយថាលោកបានដឹងពីការពិភាក្សារបស់លោកជាមួយមន្ត្រីអ៊ុយក្រែនថា ការប្រយុទ្ធប្រឆាំងអំពើពុករលួយ គឺជាបញ្ហាប្រឈមដ៏សំខាន់បំផុតសម្រាប់អ៊ុយក្រែន ហើយប្រទេសជប៉ុន បានត្រៀមខ្លួនជាស្រេចក្នុងការជួយដល់យុទ្ធនាការប្រយុទ្ធប្រឆាំងអំពើពុករលួយ និងកំណែទម្រង់ច្បាប់របស់ប្រទេសអ៊ុយក្រែន។ ការស្តារឡើងវិញរបស់ប្រទេសនេះ ពឹងផ្អែកលើការចែកចាយមូលនិធិកសាងឡើងវិញដោយសមភាព និងតម្លាភាព ពីសហគមន៍អន្តរជាតិ។
-
រដ្ឋាករទឹកស្វយ័តក្រុងភ្នំពេញកំពុងពន្លឿនការដាក់បំពង់មេនាំទឹកទៅកាន់តំបន់ជាយរាជធានីភ្នំពេញ
បច្ចុប្បន្ន រដ្ឋាករទឹកស្វយ័តក្រុងភ្នំពេញកំពុងសម្រាកសម្រាំងធ្វើការងារដាក់បំពង់មេនាំទឹកដើម្បីរុញទឹកទៅផ្គត់ផ្គង់នៅតាមតំបន់ជាយរាជធានីភ្នំពេញ ភាគខាងជើង ត្បូង លិច និងខាងកើត។ នេះបើតាមប្រសាន៍ឯកឧត្តម ឡុង ណារ៉ូ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃរដ្ឋាករទឹកស្វយ័តក្រុងភ្នំពេញ បានផ្តល់បទសម្ភាសជាមួយBTV នៅថ្ងៃទី០៦ ខែសីហានេះ។ នៅក្នុងបទសម្ភាស ឯកឧត្តមបានបន្តថា តាមការគ្រោងទុកនៅចុងឆ្នាំ២០២៤នេះ ការងារដាក់បំពង់មេនាំទឹកដែលមាននៅក្នុងផែនការមេ នឹងត្រូវបញ្ចប់នៅជំហានទី១ ក្នុងគម្រោងរោងចក្រផលិតទឹកស្អាតបាក់ខែងទី១ និងបាក់ខែងទី២។ អញ្ចឹងទឹកអាចនឹងផ្គត់ផ្គង់បាននៅប៉ែកខាងលិច និងប៉ែកខាងត្បូងឈាងខាងកើត ជាពិសេសតំបន់គួរស្រូវ។ ចំពោះប៉ែកខាងជើង និងប៉ែកខាងកើត រាជធានីភ្នំពេញ មានសង្កាត់មួយចំនួនស្ថិតនៅក្រោមការគ្រប់គ្រងរបស់ប្រតិបត្តិករឯកជន ខណៈរដ្ឋាករទឹកស្វយ័តក្រុងភ្នំពេញកំពុងធ្វើកិច្ចសហការជាមួយប្រតិបត្តិករឯកជន ដើម្បីរកវិធីផ្គត់ផ្គង់ទឹកស្អាតជូនដល់អតិថិជន។ គួរបញ្ជាក់ដែរថា បច្ចុប្បន្ន រដ្ឋាករទឹកស្វយ័តក្រុងភ្នំពេញ កំពុងដាក់ឱ្យដំណើរការរោងចក្រផលិតទឹកស្អាតចំនួន៥ទីតាំង ដែលក្នុងនោះរួមមាន៖ទី១.រោងចក្រផលិតទឹកស្អាតភូមិព្រែក ស្ថិតនៅខេត្តកណ្តាល ទី២.រោងចក្រផលិតទឹកស្អាតជ្រោយចង្វា ទី៣.រោងចក្រផលិតទឹកស្អាតចំការមន ទី៤.រោងចក្រផលិតទឹកស្អាតនិរោធ និងទី៥.រោងចក្រផលិតទឹកស្អាតបាក់ខែង ។ រោងចក្រទាំង៥នេះ អាចផលិតទឹកស្អាតបានចំនួនជិត១លានម៉ែត្រគូបក្នុងមួយថ្ងៃ៕ អត្ថបទ៖ទូច សោភ័ណ