Author: Dol Pheakdey

ប្រធានាធិបតីអ៊ីរ៉ង់ លោក ម៉ាស៊ូដ ប៉េហ្សេស្គីអាន (Masoud Pezeshkian) បានប្រាប់មហាសន្និបាតអង្គការសហប្រជាជាតិ UNGA កាលពីថ្ងៃអង្គារ (២៤ កញ្ញា) ថា អ៊ីរ៉ង់ត្រៀមខ្លួនរួចជាស្រេចដើម្បីបញ្ចប់ការប្រឈមមុខដាក់គ្នានៃភាពតានតឹងនុយក្លេអ៊ែជាមួយលោកខាងលិច ខណៈអំពាវនាវឱ្យបញ្ចប់សង្គ្រាមរបស់រុស្ស៊ីនៅអ៊ុយក្រែន តាមរយៈការសន្ទនា។ ថ្នាក់ដឹកនាំអ៊ីរ៉ង់ សង្ឃឹមថានឹងមើលឃើញការបន្ធូរបន្ថយទណ្ឌកម្មរបស់អាមេរិក ដែលបានធ្វើឱ្យសេដ្ឋកិច្ចរបស់ប្រទេសធ្លាក់ចុះ។ លោក Pezeshkian បាននិយាយថា «យើងត្រៀមខ្លួនរួចជាស្រេចដើម្បីចូលរួមជាមួយភាគីនៃកិច្ចព្រមព្រៀងនុយក្លេអ៊ែរឆ្នាំ២០១៥។ ប្រសិនបើការប្តេជ្ញាចិត្តរបស់កិច្ចព្រមព្រៀងត្រូវបានអនុវត្តយ៉ាងពេញលេញ និងដោយស្មោះត្រង់ ការសន្ទនាលើបញ្ហាផ្សេងទៀតអាចអនុវត្តតាមបន្ទាប់ពីនោះ»។ លោក Donald Trump ក្នុងតំណែងជាប្រធានាធិបតីរបស់ខ្លួននៅពេលនោះ បានបោះបង់កិច្ចព្រមព្រៀងនុយក្លេអ៊ែរឆ្នាំ២០១៥ រវាងទីក្រុងតេអេរ៉ង់ និងប្រទេសមហាអំណាចចំនួន៦ នៅក្នុងឆ្នាំ២០១៨ ហើយបានដាក់ទណ្ឌកម្មឡើងវិញយ៉ាងតឹងរ៉ឹងលើអ៊ីរ៉ង់។ កិច្ចខិតខំប្រឹងប្រែងដើម្បីស្តារកតិកាសញ្ញានេះឡើងវិញបានបរាជ័យជាបន្តបន្ទាប់។ កិច្ចព្រមព្រៀងឆ្នាំ២០១៥ ដែលលោកអតីតប្រធានាធិបតី Trump បានបោះបង់ចោលនោះ បានជំរុញការចម្រាញ់សារធាតុអ៊ុយរ៉ានីញ៉ូមរបស់អ៊ីរ៉ង់ នៅកម្រិតភាពសុទ្ធ ៣,៦៧% និងការស្តុកទុកសម្ភារៈប្រភេទនេះនៅ ២០២,៨គីឡូក្រាម ដែលនោះជាដែនកំណត់ដែលទីក្រុងតេអេរ៉ង់ បានឡើងលើសខ្លាំងរួចទៅហើយ។ អាមេរិក សម្ព័ន្ធមិត្តអឺរ៉ុប និងអ៊ីស្រាអែល បានចោទទីក្រុងតេអេរ៉ង់ថា ប្រើប្រាស់កម្មវិធីនុយក្លេអ៊ែររបស់ខ្លួនជាស្បៃមុខសម្រាប់កិច្ចប្រឹងប្រែងដើម្បីព្យាយាមអភិវឌ្ឍសមត្ថភាពផលិតអាវុធ ខណៈអ៊ីរ៉ង់និយាយថា កម្មវិធីនុយក្លេអ៊ែររបស់ខ្លួនគឺសម្រាប់តែគោលបំណងសន្តិភាពប៉ុណ្ណោះ៕

លោក ដាននី ដាណុន (Danny Danon) ឯកអគ្គរដ្ឋទូតរបស់អ៊ីស្រាអែល ប្រចាំនៅអង្គការសហប្រជាជាតិ បាននិយាយកាលពីថ្ងៃអង្គារ (២៤ កញ្ញា) ថា អ៊ីស្រាអែល បើកចំហចំពោះគំនិតទាំងឡាយណាក្នុងការបន្ធូរបន្ថយភាពតានតឹងនៃជម្លោះនៅក្នុងប្រទេសលីបង់ មួយថ្ងៃបន្ទាប់ពីសហរដ្ឋអាមេរិកបាននិយាយថា ខ្លួនកំពុងស្វែងរក “គំនិតជាក់ស្តែង” មួយចំនួនជាមួយសម្ព័ន្ធមិត្ត និងដៃគូ។ លោក Danon បានប្រាប់អ្នកយកព័ត៌មានថា “មានកម្លាំងសំខាន់ៗដែលព្យាយាមបង្កើតគំនិតកាត់បន្ថយជម្លោះ ហើយយើងបើកចំហចំពោះរឿងនោះ និងដំណោះស្រាយការទូត»។ ការប្រយុទ្ធគ្នាយ៉ាងខ្លាំងក្លាក្នុងសប្តាហ៍នេះ រវាងអ៊ីស្រាអែល និងក្រុមហេសបូឡា របស់លីបង់ ដែលគាំទ្រដោយអ៊ីរ៉ង់ បានបង្កើនការភ័យខ្លាចថា ជម្លោះជិតមួយឆ្នាំនេះនឹងផ្ទុះឡើងពេញបន្ទុក និងធ្វើឱ្យមានអស្ថិរភាពបន្ថែមទៀតនៅមជ្ឈិមបូព៌ា ជាទីដែលសង្រ្គាមរវាងក្រុមហាម៉ាស និងអ៊ីស្រាអែល កំពុងផ្ទុះឡើងរួចទៅហើយនៅក្នុងតំបន់ហ្កាហ្សា។ អ៊ីស្រាអែលនិយាយថា ខ្លួនកំពុងផ្លាស់ប្តូរការផ្តោតចេញពីតំបន់ហ្កាហ្សា ទៅកាន់ព្រំដែនភាគខាងជើង ជាទីដែលក្រុមហេសបូឡា បាននឹងកំពុងបាញ់គ្រាប់រ៉ូកែតចូលទៅក្នុងអ៊ីស្រាអែល ដើម្បីគាំទ្រក្រុមហាម៉ាស។ រដ្ឋាភិបាលអ៊ីស្រាអែល បានកំណត់អាទិភាពសង្រ្គាមក្នុងការធានាព្រំដែនភាគខាងជើងរបស់ខ្លួន និងអនុញ្ញាតឱ្យមានការវិលត្រឡប់នៅទីនោះវិញនូវអ្នកស្រុកប្រហែល ៧០.០០០នាក់ ដែលត្រូវបានជម្លៀសដោយសារជម្លោះ ខណៈក្រុមហេសបូឡា បានប្តេជ្ញាថានឹងដកថយទេរហូតដល់មានបទឈប់បាញ់នៅតំបន់ហ្កាហ្សា៕

ប្រទេសចិន បានទទួលស្គាល់ជាសាធារណៈជាលើកដំបូងថា ខ្លួនបានបាញ់បង្ហោះដោយជោគជ័យនូវមីស៊ីលបាលិស្ទិកអន្តរទ្វីប (ICBM) ចូលទៅក្នុងមហាសមុទ្រប៉ាស៊ីហ្វិកនៅថ្ងៃពុធ (២៥ កញ្ញា) នេះ ក្នុងសកម្មភាពមួយដែលទំនងជាបង្កើនការព្រួយបារម្ភជាអន្តរជាតិអំពីការសាងសង់នុយក្លេអ៊ែររបស់ប្រទេស។ ក្រសួងការពារជាតិចិន បាននិយាយនៅក្នុងសេចក្តីថ្លែងការណ៍មួយថា មីស៊ីល ICBM ដែលផ្ទុកក្បាលគ្រាប់សិប្បនិមិត្ត ត្រូវបានបាញ់ដោយកងកម្លាំងរ៉ូកែតរបស់កងទ័ពរំដោះប្រជាជនចិន PLA នៅម៉ោង ០៨:៤៤ នាទីព្រឹក (ម៉ោងនៅទីក្រុងប៉េកាំង) នៅថ្ងៃពុធ ហើយបានធ្លាក់ចូលទៅក្នុងតំបន់សមុទ្រដែលគេរំពឹងទុក ហើយនោះគឺជា «ការរៀបចំជាទម្លាប់នៅក្នុងផែនការបណ្តុះបណ្តាលប្រចាំឆ្នាំរបស់កងទ័ព» និងមិនមានទិសដៅដាក់ប្រទេស ឬគោលដៅណាមួយឡើយ។ យោងតាមរបាយការណ៍របស់សារព័ត៌មានស៊ីនហួរ ដាច់ដោយឡែកមួយបានឱ្យដឹងថា ប្រទេសចិន «ជូនដំណឹងដល់បណ្តាប្រទេសដែលពាក់ព័ន្ធជាមុន» ដោយមិនបានបញ្ជាក់ពីផ្លូវរបស់មីស៊ីល ឬទីតាំងពិតប្រាកដណាមួយនៅក្នុង «ដែនទឹកដ៏ធំល្វឹងល្វើយនៃមហាសមុទ្រប៉ាស៊ីហ្វិក» ដែលមីស៊ីលនោះបានធ្លាក់ចូលទេ។ ទីភ្នាក់ងារព័ត៌មានស៊ីនហួរ បានរាយការណ៍ថា ការបាញ់បង្ហោះនេះ «បានសាកល្បងប្រកបដោយប្រសិទ្ធភាពនូវដំណើរការនៃសព្វាវុធ និងឧបករណ៍ និងកម្រិតហ្វឹកហ្វឺនរបស់កងទ័ព ហើយសម្រេចបាននូវគោលដៅដែលរំពឹងទុក»។ យ៉ាងណាក៏ដោយ អ្នកវិភាគមួយចំនួនអះអាងថា ល្បឿននៃការបង្កើតនុយក្លេអ៊ែររបស់ចិន ហួសពីការរារាំងអប្បបរមាដែលអាចទុកចិត្តបាន ខណៈទីក្រុងប៉េកាំងនិយាយថា ខ្លួនប្រកាន់ខ្ជាប់នូវគោលនយោបាយ «មិនប្រើប្រាស់អាវុធដាក់គេមុន»៕

ទឹកជំនន់ដែលបង្កឡើងដោយភ្លៀងធ្លាក់ខ្លាំង និងផ្គររន្ទះបានបន្តបង្កឱ្យមានការរំខាននៅទូទាំងតំបន់ភាគកណ្តាល និងភាគខាងត្បូងនៃប្រទេសអង់គ្លេស ខណៈសន្ធឹកទឹកភ្លៀងបានស្រុតចុះបន្តិច។ ខណៈកាលពីថ្ងៃអង្គារសប្ដាហ៍នេះ ពុំមានភ្លៀងធ្លាក់ខ្លាំងបន្ថែមទៀត សាលារៀន និងផ្លូវមួយចំនួននៅតែបិទ។ កាលពីល្ងាចថ្ងៃអង្គារសប្ដាហ៍នេះដែរ មានការព្រមានអំពីទឹកជំនន់ជាង ២០លើក ដែលមានន័យថាទឹកជំនន់ត្រូវរំពឹងទុកថាអាចនឹងកើតឡើង និងការជូនដំណឹងអំពីទឹកជំនន់ជាង ៥០លើក ដែលមានន័យថាទឹកជំនន់អាចកើតឡើង ។ តំបន់មួយចំនួនមានភ្លៀងធ្លាក់ច្រើនក្នុងរយៈពេលប៉ុន្មានម៉ោងកាលពីចុងសប្តាហ៍មុន និងថ្ងៃចន្ទដើមសប្ដាហ៍នេះ។ ការព្រមានអំពីអាកាសធាតុពណ៌លឿងសម្រាប់ភ្លៀងធ្លាក់នៅថ្ងៃព្រហស្បតិ៍ ក្នុងតំបន់ភាគខាងជើងនៃប្រទេសអង់គ្លេស ក៏ត្រូវបានចេញផ្សាយផងដែរ។ផ្លូវនានាត្រូវបានបិទ ហើយផ្លូវរថភ្លើងត្រូវបានរងការរំខាន ។ តំបន់ជាច្រើនបានរងផលប៉ះពាល់រួមទាំងតំបន់មួយចំនួន នៅទីក្រុង Northampton ទីក្រុង Somerset ទីក្រុង Buckinghamshire និងទីក្រុង Worcestershire រហូតទៅដល់ទីក្រុង Newport ក្នុងដែនដីវ៉េលស៍ (Wales) របស់អង់គ្លេស។ កាលពីសប្ដាហ៍មុន ព្យុះភ្លៀង និងទឹកជំនន់ បានវាយប្រហារប្រទេសមួយចំនួននៅអឺរ៉ុបកណ្ដាល ដូចជា ប្រទេសអ៊ីតាលី សាធារណរដ្ឋឆែក ស្លូវ៉ាគី ប៉ូឡូញ និង អូទ្រីស ដែលបានឆក់យកជីវិតមនុស្ស២៤នាក់ ៕

ព្រះមហាក្សត្ររបស់ប្រទេសថៃ បានប្រទានរាជានុម័តច្បាប់សមភាពអាពាហ៍ពិពាហ៍ ដែលបានអនុម័តដោយសភាកាលពីដើមឆ្នាំនេះ ដោយធ្វើឱ្យព្រះរាជាណាចក្រនេះក្លាយជាប្រទេសដំបូងគេនៅអាស៊ីអាគ្នេយ៍ និងជាអ្នកទី៣ នៅអាស៊ីដែលទទួលស្គាល់អាពាហ៍ពិពាហ៍របស់គូស្នេហ៍ភេទដូចគ្នា។ រាជានុម័តរបស់ព្រះមហាក្សត្រត្រូវបានបោះពុម្ពផ្សាយនៅក្នុងកាសែតប្រចាំរាជវាំងកាលពីល្ងាចថ្ងៃអង្គារ (២៤ កញ្ញា) មានន័យថា សំណើច្បាប់នេះនឹងចូលជាធរមានក្នុងរយៈពេល ១២០ថ្ងៃ ដែលត្រូវនឹងថ្ងៃទី២២ ខែមករា ឆ្នាំ២០២៥។ ច្បាប់ដែលជាចំណុចសំខាន់នៃកិច្ចខិតខំប្រឹងប្រែងរយៈពេលពីរទសវត្សរ៍ដោយសកម្មជន ត្រូវបានអនុម័តដោយព្រឹទ្ធសភាកាលពីខែមិថុនា។ ប្រទេសថៃ ដែលជាគោលដៅទេសចរណ៍ដ៏ពេញនិយមបំផុតមួយរបស់អាស៊ី មានភាពល្បីល្បាញចំពោះវប្បធម៌ និងការអត់ឱនចំពោះអ្នកស្រឡាញ់ភេទដូចគ្នារបស់ខ្លួន។ ជាមួយនឹងសំណើច្បាប់ជាប្រវត្តិសាស្ត្រនេះ ប្រទេសថៃបានក្លាយជាប្រទេសដំបូងគេនៅអាស៊ីអាគ្នេយ៍ដែលផ្ដល់ភាពស្របច្បាប់ក្នុងអាពាហ៍ពិពាហ៍ភេទដូចគ្នា និងជាអ្នកទីបីក្នុងអាស៊ី បន្ទាប់ពីនេប៉ាល់ និងកោះតៃវ៉ាន់។ រដ្ឋាភិបាលដែលដឹកនាំដោយគណបក្សភឿថៃ បានដាក់សមភាពអាពាហ៍ពិពាហ៍ក្នុងចំណោមគោលដៅចម្បងរបស់ខ្លួន និងបានខិតខំប្រឹងប្រែងយ៉ាងខ្លាំងដើម្បីកំណត់អត្តសញ្ញាណខ្លួនជាមួយនឹងក្បួនដង្ហែទិវាឥន្ទធនូ (ទិវាសម្រាប់អ្នកស្រឡាញ់ភេទដូចគ្នា) នៅទីក្រុងបាងកកប្រចាំឆ្នាំ ក្នុងខែមិថុនា ដែលមនុស្សរាប់ពាន់នាក់បានប្រារព្ធនៅក្នុងតំបន់ពាណិជ្ជកម្មដ៏មមាញឹកបំផុតមួយរបស់រាជធានីថៃ៕

ចំហេះព្រៃដ៏សន្ធោសន្ធៅបានឆាបឆេះពាសពេញរដ្ឋធានី គីតូ នៃប្រទេសអេក្វាឌ័រ ជាមួយនឹងផ្សែងដ៏ក្រាស់ ដែលគំរាមកំហែងដល់ផ្ទះសម្បែងកាលពីថ្ងៃអង្គារ (២៤ កញ្ញា) ខណៈអាជ្ញាធរបានប្រញាប់ប្រញាល់គ្រប់គ្រងអណ្ដាតភ្លើងស្របពេលដែលគ្រោះរាំងស្ងួតជាប្រវត្តិសាស្ត្របានប៉ះពាល់ដល់ធនធានរបស់ប្រទេស។ លោកប្រធានាធិបតី ដានីញែល ណូបូអា (Daniel Noboa) បាននិយាយថា កងកម្លាំងប្រដាប់អាវុធត្រូវបានដាក់ពង្រាយដើម្បីប្រយុទ្ធប្រឆាំងនឹងចំហេះ ដែលបានចាប់ផ្តើមនៅពាក់កណ្តាលថ្ងៃត្រង់នៅក្នុងតំបន់ ក្វ័រពូឡូ (Guapulo) ហើយបានរាលដាលបន្តិចម្តងៗទៅកាន់លំនៅដ្ឋានរបស់អ្នកស្រុក និងតំបន់ព្រៃឈើនៅក្បែរនោះ។ អ្នកស្រុកបាននិយាយថា ពួកគេប្រឹងប្រែងទាំងអស់សង្ឃឹមដើម្បីព្យាយាមពន្លត់អណ្ដាតភ្លើង។ ពុំមានអ្នកស្លាប់ ឬរបួសធ្ងន់ធ្ងរត្រូវបានគេរាយការណ៍ឡើយ។ ក្រុមពន្លត់អគ្គិភ័យរបស់ទីក្រុងគីតូបាននិយាយថា កងកម្លាំងរបស់ខ្លួនត្រូវបានដាក់ពង្រាយទាំងស្រុង ហើយអង្គភាពរបស់ខ្លួនបន្តទប់ទល់នឹងចំហេះពេញមួយយប់។ គ្រោះរាំងស្ងួតដ៏អាក្រក់បំផុតរបស់អេក្វាឌ័រ ក្នុងរយៈពេលជាង ៦០ឆ្នាំ បានធ្វើឱ្យប្រទេសដែលពឹងផ្អែកលើវារីអគ្គិសនីមួយនេះធ្លាក់ចូលទៅក្នុងវិបត្តិថាមពល ខណៈអាងស្តុកទឹកដែលថយចុះ បង្កការប៉ះពាល់ដល់ទំនប់វារីអគ្គិសនី។ រដ្ឋមន្ត្រីថាមពលរបស់ប្រទេស បានប្រកាសពីការកាត់ផ្តាច់ចរន្តអគ្គិសនីរយៈពេល ១២ម៉ោងនៅទូទាំងប្រទេសកាលពីថ្ងៃចន្ទ ហើយបាននិយាយថា រដូវប្រាំងរបស់ប្រទេសបានចាប់ផ្តើមពីរខែលឿនជាងធម្មតា៕

ប្រធានាធិបតីអ៊ុយក្រែន លោក Volodymyr Zelenskiy បានប្រាប់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃអង្គារ (២៤ កញ្ញា) ថា សង្រ្គាមរវាងរុស្ស៊ី និងអ៊ុយក្រែន មិនអាចស្ងប់ស្ងាត់ដោយការពិភាក្សាតែម្ខាងនោះទេ ប៉ុន្តែថាទីក្រុងមូស្គូ ត្រូវតែបង្ខំឱ្យមកចូលរួមក្នុងកិច្ចចរចាសន្តិភាព។ លោក Zelenskiy បានស្វះស្វែងរកការគាំទ្រពីបណ្ដាមេដឹកនាំលោកខាងលិច សម្រាប់អ្វីដែលលោកហៅថា “ផែនការជ័យជម្នះ” ដើម្បីបញ្ចប់សង្រ្គាមដ៏អូសបន្លាយ ដែលកើតឡើងនៅពេលដែលរុស្ស៊ី ចាប់ផ្តើមប្រតិបត្តិការយោធាពិសេសនៅខែកុម្ភៈ ឆ្នាំ២០២២។ លោក Zelenskiy បាននិយាយថា សង្រ្គាមនឹងបញ្ចប់នៅថ្ងៃណាមួយ ប៉ុន្តែមិនមែនដោយសារតែ “នរណាម្នាក់ធុញទ្រាន់នឹងសង្រ្គាម” ឬតាមរយៈការដោះដូរជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) នោះទេ ដែលនេះជាសេចក្ដីយោងទៅលើសំណើដែលថាឱ្យអ៊ុយក្រែនប្រគល់ទឹកដីមួយចំនួនដែលកាន់កាប់ដោយរុស្ស៊ី ដើម្បីដោះស្រាយជម្លោះ។ លោក Zelenskiy លើកឡើងថា “សង្រ្គាមនេះមិនអាចស្ងប់ស្ងាត់ដោយត្រឹមតែការពិភាក្សាបានទេ ប៉ុន្តែសកម្មភាពជាក់ស្ដែងគឺចាំបាច់ណាស់” និងថ្លែងអំណរគុណដល់ប្រទេសនានាដែលបានផ្តល់ការគាំទ្រដល់អ៊ុយក្រែន។ មេដឹកនាំអ៊ុយក្រែនរូបនេះបន្តថា “លោក ពូទីន នឹងមិនបញ្ឈប់សកម្មភាពកម្រោលដោយខ្លួនឯងទេ មានតែត្រូវបង្ខំឱ្យរុស្ស៊ី មកចរចាសន្តិភាពប៉ុណ្ណោះ”។ អ៊ុយក្រែន ប្រឈមមុខនឹងអនាគតមិនច្បាស់លាស់។ ជ័យជម្នះរបស់អតីតប្រធានាធិបតីអាមេរិក លោក Donald…

លីបង់បាននិយាយថា មានតែក្រុងវ៉ាស៊ីនតោនប៉ុណ្ណោះដែលអាចជួយបញ្ចប់ការបាញ់ផ្លោងដ៏ខ្លាំងក្លារបស់អ៊ីស្រាអែល និងការប្រយុទ្ធគ្នាបាន ខណៈការវាយកលុករបស់អ៊ីស្រាអែលចាប់តាំងពីព្រឹកថ្ងៃចន្ទដើមសប្ដាហ៍នេះ បានសម្លាប់មនុស្ស១៦៩នាក់ រួមទាំងកុមារ៥០ នាក់ និងមនុស្សចំនួន១.៨៣៥នាក់ រងរបួសក្នុងប្រទេសលីបង់។ រដ្ឋមន្ត្រីការបរទេសលីបង់ លោក Abdallah Bou Habib បានរិះគន់សុន្ទរកថារបស់លោក Biden ថា គ្មានភាពរឹងមាំ និងគ្មានការសន្យា ហើយបាននិយាយថា សហរដ្ឋអាមេរិកគឺជាប្រទេសតែមួយគត់ដែលពិតជាអាចធ្វើឱ្យមានការផ្លាស់ប្តូរស្ថានការណ៍នៅមជ្ឈិមបូព៌ា ក៏ដូចជាទាក់ទងនឹងប្រទេសលីបង់។ ទីក្រុងវ៉ាស៊ីនតោន គឺជាសម្ព័ន្ធមិត្តដ៏យូរលង់របស់អ៊ីស្រាអែល និងជាអ្នកផ្គត់ផ្គង់អាវុធធំបំផុត។ ការវាយលុកថ្មីប្រឆាំងនឹងក្រុមហេសបូឡា បានធ្វើឱ្យមានក្ដីបារម្ភយ៉ាងខ្លាំងថា ជម្លោះជិតមួយឆ្នាំរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនហាម៉ាស នៅតំបន់ហ្កាហ្សាកំពុងរីកមាឌ និងអាចបង្កអស្ថិរភាពនៅមជ្ឈិមបូព៌ា។ ចក្រភពអង់គ្លេសបានជំរុញឱ្យប្រជាពលរដ្ឋរបស់ខ្លួនចាកចេញពីប្រទេសលីបង់ ហើយបាននិយាយថា ខ្លួនកំពុងបញ្ជូនកងទ័ពចំនួន៧០០ នាក់ទៅកាន់ប្រទេសកោះហ្ស៊ីប ដើម្បីជួយពលរដ្ឋរបស់ខ្លួនក្នុងការជម្លៀសចេញ។ ក្រុមប្រឹក្សាសន្តិសុខអង្គការសហប្រជាជាតិបាននិយាយថា ខ្លួននឹងជួបប្រជុំគ្នានៅថ្ងៃពុធសប្ដាហ៍នេះ ដើម្បីពិភាក្សាអំពីជម្លោះនេះ៕